फॅशन डिझाइनर महिलेचा कारनामा; श्रीमंतांची मैत्री, प्रेमाचं नाटक, लॉजवर भेटायला बोलवायची, मग...

इतक्यावरच न थांबता दीपा पीडित व्यक्तीला फोन करत होती. या पुरुषांकडून ब्लॅकमेल करून त्यांच्याकडून पैसे उकळायची.

बंगळुरू - कर्नाटकच्या बेळगावी पोलिसांनी एका फसवणूक करणाऱ्या महिलेला अटक केली आहे. या महिलेने सोशल मीडियाला तिचे शस्त्र बनवले होते. श्रीमंत मुलांशी मैत्री करायची, त्यांना लॉजवर भेटायला बोलवायची आणि त्यानंतर चलाखीने त्यांच्याकडून पैसे, सोने आणि वाहने घेऊन फरार व्हायची. या महिलेने बऱ्याच पुरुषांना तिच्या जाळ्यात ओढून अशीच फसवणूक केली आहे. या प्रकरणात अनेक खुलासे तपासात उघड होत आहेत. 

हनीट्रॅप फ्रॉडने पोलिसांना हैराण केले आहे. या प्रकरणी ३३ वर्षीय महिला दीपा अवतागी हिला पोलिसांनी अटक केली. ती बागलकोट जिल्ह्यातील महालिंगपूरची राहणारी असून व्यवसायाने फॅशन डिझाईनर आहे. माहितीनुसार, ही महिला इन्स्टाग्राम आणि फेसबुकसारख्या सोशल मीडियाचा वापर करून हायप्रोफाईल पुरुषांना टार्गेट करत होती. आधी मैत्री करून हळूहळू विश्वास संपादन करायची. त्यानंतर त्याचा फायदा घेऊन ती त्या पुरुषांची आर्थिक फसवणूक करत होती. दीपा अशा पुरुषांना फसवायची ज्यांची आर्थिक स्थिती चांगली असेल. 

सोशल मीडियावर दीपा आधी त्या पुरुषाला मेसेज पाठवायची. त्यानंतर त्याच्याशी बोलायची. दोघांमध्ये संवाद सुरू झाल्यावर समोरच्याला विश्वासात घेत होती. या दोघांमधील जवळीक वाढली तर दीपा त्या व्यक्तीला भेटायला बोलवत होती. कुठल्याही तरी लॉज अथवा हॉटेलमध्ये दीपा त्यांना भेटायची. आतापर्यंत तिच्या या जाळ्यात अनेक पुरुष अडकले आहेत. लॉजवर बोलवल्यावर दीपा काही तरी बहाणा बनवून पीडिताला बाथरूमला पाठवायची. जसे तो व्यक्ती बाथरूमला जायचा तेव्हा संधीचा फायदा घेत ती पैसे, रोकड, सोने आणि बॅग असं सामान घेऊन फरार व्हायची. काही घटनांमध्ये तिने पीडित व्यक्तीची कारही पळवली आहे. 

दरम्यान, इतक्यावरच न थांबता दीपा पीडित व्यक्तीला फोन करत होती. या पुरुषांकडून ब्लॅकमेल करून त्यांच्याकडून पैसे उकळायची. जर पैसे दिले तर तुझे सामान परत करेन असं ती म्हणत होती. मात्र त्यानंतर पुन्हा पैसे लुटण्याचा डाव रचायची. अनेक पीडित पुरुषांनी बदनामीच्या भीतीने त्यांच्यासोबत घडलेला प्रकार कुणाला सांगितला नाही. जर पीडित व्यक्तीने पैसे देण्यास नकार दिला तर खोट्या पोलीस प्रकरणात त्याला अडकवण्याची धमकी दिली जात होती. या भीतीतून पीडितांनी पोलिसांनाही हा प्रकार सांगितला नाही. अखेर एका तक्रारीवरून या संपूर्ण प्रकरणाचा पर्दाफाश झाला. या प्रकरणी पोलिसांनी आरोपी दीपा अवतागी हिला अटक केली असून तिच्या काळ्या कारनाम्याची माहिती समोर आणली जात आहे.