महिलांचे अंतर्वस्त्र चोरायचा आणि...; २३ वर्षीय तरुणाचे विकृत कृत्य, पोलिसांनी ठोकल्या बेड्या!

Bengaluru Womens Undergarments theft: नोकरीच्या शोधात बेंगळुरूत आलेल्या एका तरुणाच्या अजब आणि विकृत कृत्याने मोठी खळबळ उडाली. हेब्बागोडी पोलिसांनी एका २३ वर्षीय तरुणाला बेड्या ठोकल्या आहेत.

नोकरीच्या शोधात शहरात आलेल्या एका तरुणाच्या विकृत कृत्याने बेंगळुरूमध्ये खळबळ उडाली आहे. महिलांचे अंतर्वस्त्र चोरून ते स्वतः परिधान करणे आणि त्याचे सेल्फी व व्हिडिओ काढणाऱ्या २३ वर्षीय तरुणाला हेब्बागोडी पोलिसांनी अटक केली आहे. अमल एन.जी. असे या आरोपीचे नाव असून तो मूळचा केरळचा रहिवासी आहे.

पोलिसांनी दिलेल्या माहितीनुसार, अमल सहा महिन्यांपूर्वी नोकरी शोधण्यासाठी बेंगळुरूमध्ये आला होता. तो आपल्या एका मित्रासोबत हेब्बागोडी परिसरात पेइंग गेस्ट म्हणून राहत होता. सोमवारी विद्यानगर परिसरातील एका घराबाहेर वाळत घातलेली महिलांची अंतर्वस्त्रे चोरताना स्थानिकांनी त्याला रंगेहात पकडले. त्यानंतर त्याला पोलिसांच्या स्वाधीन करण्यात आले. अमलला ताब्यात घेतल्यावर पोलिसांनी त्याच्या खोलीची झडती घेतली. यावेळी एका पिशवीत लपवून ठेवलेले महिलांच्या अंतर्वस्त्रांचे सुमारे १५ ते २० जोड सापडले. आरोपीने हेब्बागोडी परिसरात फिरून विविध घराबाहेरून आणि पीजी निवासस्थानांबाहेरून ही चोरी केल्याची कबुली दिली आहे.

तपास अधिकाऱ्यांनी अमलचा मोबाईल तपासला असता पोलिसांनाही धक्का बसला. त्याच्या मोबाईलमध्ये चोरी केलेली महिलांची अंतर्वस्त्रे स्वतः परिधान करून काढलेले अनेक सेल्फी आणि व्हिडिओ सापडले आहेत. तो केवळ चोरीच करत नव्हता, तर त्यातून स्वतःचे विकृत मानसिक समाधान मिळवत असल्याचे तपासात समोर आले आहे. आरोपी अमल हा सुशिक्षित असला तरी गेल्या सहा महिन्यांपासून तो बेरोजगार होता. रिकाम्या वेळेत तो परिसरात फिरून अशा प्रकारे चोरी करत असे. पोलिसांनी त्याच्यावर चोरी आणि विनयभंगाच्या कलमान्वये गुन्हा दाखल केला असून पुढील तपास सुरू आहे.