आशिष सिंहमुंबई - दाऊदने डी कंपनी चालवण्यासाठी स्वतःचे नेटवर्क तयार केले असून सांकेतिक भाषा आणि सहजासहजी उलगडता येणार नाही, अशा कोडवर्डचा वापर करून तो व्हॉइस मेसेज पाठवत असल्याची माहिती राष्ट्रीय तपास यंत्रणेने (एनआयए) मिळवली आहे.
दाऊदने काही दिवसांपूर्वीच पाकिस्तानातील आपला पत्ता बदलला असून सध्या तो कराचीत पाकिस्तानी संरक्षण मंत्रालयाच्या ताब्यातील जागेत राहत असल्याचा सुगावाही यंत्रणांना याच चौकशीत लागला आहे. याच काळात दाऊदने पाकिस्तानातील एका पठाण युवतीशी दुसरा निकाह केल्याची माहिती त्याने दिली. दुसरा निकाह करण्यासाठी दाऊदने पहिली पत्नी मेहजबीन हिला तलाक दिल्याचे सांगितले जात होते. पण त्यात तथ्य नाही. ती जाणीवपूर्वक पसरवलेली अफवा होती. उलट मेहजबीन दाऊदच्या वतीने भारतातील नातलगांच्या संपर्कात असल्याची माहिती दाऊदचा भाचा आणि हसीना पारकरचा मुलगा अलीशाह इब्राहीम पारकर याने एनआयएच्या चौकशीदरम्यान दिली.
अर्थात, दाऊदने पाकिस्तानातील एका पठाण युवतीशी दुसरा निकाह केल्याची माहिती खरी असल्याचे त्याने सांगितले. गेल्या वर्षी जुलैत मेहजबीनला दुबईत भेटलो, तेव्हा तिनेच ही माहिती दिल्याचे तो म्हणाला. सण-वार आणि अन्य कारणांसाठी सध्या तीच दाऊदच्या नातलगांच्या, मित्र परिवाराच्या संपर्कात असल्याचे अली शाहने चौकशीत कबूल केले.
दाऊदला मेसेज पाठवायचा असेल तर... आरिफ भाईजान त्याचा सांकेतिक भाषेतील आणि कोडवर्डचा वापर केलेला व्हॉइस मेसेज (एन्क्रिप्टेड व्हॉइस मेसेज) रेकॉर्ड करतो. तो उघडण्यासाठीही पासवर्ड असतो. हा मेसेज तो शब्बीर शेखला पाठवतो. शब्बीर शेख तो दुबईतील मध्यस्थ किंवा दाऊदचे व्यवहार सांभाळणाऱ्या जैदला पाठवतो. जैद आपल्या दुबईतील नंबरचा वापर करून तो मेसेज कराचीत छोटा शकीलला पाठवतो. तो मेसेज छोटा शकील दाऊदला सांगतो.
संरक्षण खात्याच्या जागेत मुक्कामदाऊद सध्या कराचीत अब्दुला गाजीबाबा दर्ग्याच्या मागच्या बाजूला असलेल्या रहीम फाकी परिसरात असलेल्या संरक्षण खात्याच्या ताब्यातील जागेत राहत आहे.
कसे चालते दाऊदचे नेटवर्क? दाऊद सध्या कोणाच्याही थेट संपर्कात नसला तरी आपली गँग चालवण्यासाठी, कारभारासाठी अनेक चाळण्यांतून जाणारे स्वतंत्र नेटवर्क त्याने उभारले आहे. त्यातून त्याच्या कंपनीतील लोकांना त्याचा मेसेज बरोबर पोहोचवला जातो, अशी माहिती छोटा शकीलचा मेव्हणा आरिफ अबुबकर शेख उर्फ आरिफ भाईजान आणि त्याचा भाऊ शब्बीर शेख यांच्या चौकशीतून उघड झाली.
तो मेसेज ऐकल्यावर... दाऊद त्याचा निरोप किंवा सूचना छोटा शकीलला देतो. छोटा शकील त्याचे रूपांतर पुन्हा सांकेतिक भाषेतील व्हॉइस मेसेजमध्ये करतो. त्यालाही विशिष्ट पासवर्ड असतो. छोटा शकीलकडून तो मेसेज दुबईत जैदला पाठवला जातो. जैद दुसऱ्या नंबरवरून तो शब्बीरला पाठवतो. शब्बीर तो मेसेज आरिफ भाईजानला पाठवतो.
हवालासाठीही नेटवर्कहवालामार्फत केल्या जाणाऱ्या आर्थिक व्यवहारांसाठीही याच पद्धतीने सांकेतिक लिपीतील मेसेजचा वापर केला जातो. त्याचे मेसेज पाठवण्याचा आणि निरोप मिळवण्याचा क्रमही याच पद्धतीने असल्याचा सुरक्षा यंत्रणांचा दावा आहे. यात वेगवेगळे नेटवर्क, नंबर वापरले जात असल्याने त्याचा माग काढणे कठीण बनते आणि सुरक्षा यंत्रणांना गुंगारा दिला जात असल्याचे चौकशीत उघड झाले. या पद्धतीने नेटवर्किंगचे, निरोप पाठविण्याचे वर्तुळ पूर्ण होते. याच सिस्टिमचा वापर करून सध्या दाऊदचा कारभार सुरू असल्याचे एनआयएच्या तपासात उघड झाले आहे.