यूपीच्या महोबामध्ये एका तरुणाने गळफास घेऊन आत्महत्या केली. तरुणाने ५५ सेकंदाचा व्हिडीओ बनवला आणि ६ पानांची सुसाईड नोट सोडली. सुसाईड नोटमध्ये महिलेने अश्लील व्हिडीओ बनवून ब्लॅकमेल केल्याचा आरोप करण्यात आला आहे. पोलिसांनी सुसाईड नोट ताब्यात घेऊन या प्रकरणाचा तपास सुरू केला आहे. गुन्हा दाखल करून कारवाई करण्यात येत आहे.
मिळालेल्या माहितीनुसार, हे प्रकरण कबराई पोलीस स्टेशन हद्दीतील गांधीनगर भागातील आहे. कुलदीप गुप्ता याने राहत्या घरी गळफास लावून घेतला. घरात मृतदेह लटकल्याची माहिती मिळताच कुटुंबीय पोहोचले तेव्हा त्यांच्या पायाखालची जमीनच सरकली. घटनेची माहिती पोलिसांना देण्यात आली. पोलिसांनी घटनास्थळी पोहोचून मृतदेह ताब्यात घेतला आणि झडती घेतली असता खिशातून सुसाईड नोटही सापडली.
सुसाईड नोटनुसार, कुलदीपचे छानिकला गावात राहणाऱ्या एका विवाहित महिलेसोबत प्रेमसंबंध होते. ती महिला त्याचे आर्थिक आणि मानसिक शोषण करत होती. सहा पानी सुसाईड नोटमध्ये तरुणाने म्हटलं आहे की, दोन वर्षांपूर्वी ही महिला त्याच्या किराणा दुकानात ग्राहक म्हणून आली होती. मग हळूहळू ती जवळ आली आणि मला प्रेमाच्या जाळ्यात अडकवलं.
महिलेने अश्लील व्हिडीओ बनवला आणि नंतर ब्लॅकमेल करून पैसे उकळण्यास सुरुवात केली, असं सुसाईड नोटमध्ये लिहिलं आहे. महिलेच्या पतीनेही पैसे उकळण्यास सुरुवात केली. किराणा दुकानाचं नुकसान होऊ लागले. यामुळे तो नैराश्यात गेला. महिला आर्थिक व मानसिक छळ करू लागली.
आत्महत्या करण्यापूर्वी तरुणाने एक व्हिडीओ बनवला होता जो व्हायरल झाला होता. ५५ सेकंदाच्या या व्हिडिओमध्ये महिलेने छळ केल्याचा आरोप केला आहे. अनेक दिवसांपासून कुलदीप नैराश्यात होता आणि त्याने हे पाऊल उचलल्याचं मृताच्या नातेवाईकांचं म्हणणं आहे. मृताच्या भावाने सांगितलं की, कबराई शहरात किराणा दुकान होते, तेथे महिला सामान घेण्यासाठी येत असे. पोलीस या प्रकरणाचा अधिक तपास करत आहेत.