"मी मेलो नाही, मला मारलं गेलंय..."; राजाचा मृतदेह सापडल्यानंतर इंदूरमध्ये लागला बॅनर

ज्याठिकाणी राजाचा मृतदेह सापडला तिथेच जवळ सोनमचा शर्ट आणि तुटलेला मोबाईल जप्त करण्यात आला आहे

इंदूर - मेघालयच्या शिलांगमध्ये हनीमूनसाठी गेलेले इंदूरचे जोडपे अचानक बेपत्ता झाले. यातील पती राजा रघुवंशीचा मृतदेह सापडला. मात्र या प्रकरणी वेगळेच वळण आले आहे. राजाच्या इंदूर येथील घराबाहेर मोठे पोस्टर लावण्यात आले आहे. त्यातून राजाच्या हत्येची कसून चौकशी करून आम्हाला न्याय द्यावा अशी मागणी कुटुंबाने केली आहे.

या पोस्टरमध्ये राजा आणि त्याची पत्नी सोनम यांचा फोटो छापण्यात आला आहे. त्या केंद्र सरकार आणि राज्य सरकारला उल्लेखून मेसेज लिहिण्यात आला आहे. "राजा की आत्मा करे पुकार, मै मरा नही, मुझे मारा गया है.." CBI तपास करा अशी मागणी करण्यात आली आहे. ट्रान्सपोर्ट व्यावसायिक राजा रघुवंशी आणि त्यांची पत्नी सोनम यांचं ११ मे रोजी लग्न झाले होते. २० मे रोजी हे दोघे हनीमूनसाठी शिलांगला गेले होते. २३ मे रोजी हे जोडपे अचानक बेपत्ता झाले. ११ दिवस उलटल्यानंतर २ जून रोजी राजाचा मृतदेह शिलांगच्या सोहरा परिसरातील वेई सॉडॉन्ग धबधब्याजवळील दरीत सापडला. 

राजाच्या मृतदेहाचे पोस्टमोर्टम केले तेव्हा त्याची हत्या झाल्याचे उघड झाले. अद्याप राजाची पत्नी सोनम ही गायब आहे. पोलीस तिचा शोध घेत आहेत. मेघालय पोलिसांनी या प्रकरणी विशेष तपास पथक नेमलं आहे. परंतु राजाच्या कुटुंबाचे स्थानिक पोलिसांच्या तपासावर विश्वास नाही. त्यामुळे या पोस्टरच्या माध्यमातून त्यांनी केंद्रीय तपास यंत्रणा सीबीआयकडे चौकशीची मागणी केली आहे. ही सूनियोजित केलेली हत्या आहे. त्यामुळे सत्य समोर आणण्यासाठी सीबीआयची गरज आहे असं कुटुंबाने म्हटलं.

दरम्यान, ज्याठिकाणी राजाचा मृतदेह सापडला तिथेच जवळ सोनमचा शर्ट आणि तुटलेला मोबाईल जप्त करण्यात आला आहे. राजा आणि सोनम हनीमूनसाठी शिलांगला गेले होते. अचानक त्यांच्याशी संपर्क बंद झाला त्यामुळे कुटुंबाला चिंता सतावली. त्यांनी तात्काळ पोलिसांकडे धाव घेत संबंधित घटनेची माहिती दिली. त्यानंतर मध्य पोलीस आणि मेघालय पोलीस या घटनेचा तपास करत आहेत. त्यात राजाचा मृतदेह सापडल्याने कुटुंबाला मोठा धक्का बसला. सोनम अद्यापही बेपत्ता असल्याने ती सुरक्षित सापडेल अशी अपेक्षा कुटुंबाला आहे.