४० लाख खर्च करून इन्कम टॅक्स अधिकाऱ्याशी मुलीचं लग्न लावलं; २१ महिन्यांनी 'सत्य' बाहेर, मग...

ग्वाल्हेरमधील २७ वर्षीय इंजिनिअर मुलीचं लग्न २१ महिन्यांपूर्वी मुरैना येथे राहणाऱ्या महावीर अवस्थीसोबत केले होते. हा युवक सरकारी नोकरीत होता

ग्वाल्हेर - महावीर अवस्थी, इन्कम टॅक्स अधिकारी...याच नावावर ४० लाख हुंडा घेऊन एका पित्याने त्याच्या इंजिनिअर मुलीचं लग्न लावले. लग्नाच्या २१ महिन्यांनी जे सत्य समोर आले त्याने कुटुंबाच्या पायाखालची जमीन सरकली. ज्या मुलासोबत मुलीचे लग्न लावले तो सरकारी नोकरीत नाही. तो एक विश्वासघातकी आहे जो फसवणूक करून मुलींना जाळ्यात ओढतो. त्यानंतर पीडित पत्नी आणि तिच्या कुटुंबाने पोलीस ठाण्यात धाव घेत याबाबत तक्रार दाखल केली.

ग्वाल्हेरमधील २७ वर्षीय इंजिनिअर मुलीचं लग्न २१ महिन्यांपूर्वी मुरैना येथे राहणाऱ्या महावीर अवस्थीसोबत केले होते. हा युवक सरकारी नोकरीत होता. त्यामुळे मुलीच्या घरच्यांनी लग्नाला लगेच होकार दिला. लग्नावेळी मुलाची पोस्टिंग कोलकाता येथे आहे असं त्याने दावा केला. महावीर मुरैना जिल्ह्यातील कॅमरी गावात राहणारा होता. लग्नाच्या निमंत्रण पत्रिकेवर मुलाच्या शिक्षणासोबत तो आयकर विभागात अधिकारी असल्याचे छापण्यात आले. लग्नावेळी मुलीच्या वडिलांनी जवळपास ४० लाख हुंडा म्हणून दिला होता. 

लग्नानंतर काही दिवसांनी महावीर पत्नीला सोडून कथितपणे ड्युटीला निघून गेला. त्यानंतर सासरच्या लोकांनी सूनेचा छळ सुरू केल्याचा आरोप आहे. लग्नानंतर काही महिन्यांनी सासरच्यांनी सूनेच्या घरच्यांकडून ७० लाख आणि एका कारची मागणी केली. मुलीच्या कुटुंबाने विरोध करताच मुलाने मी आयकर खात्यात अधिकारी आहे इतका तर माझा हक्क आहे असं म्हटले. परंतु जेव्हा मुलीला पतीचा खरा चेहरा कळला तेव्हा तिला धक्का बसला. नातेवाईकांच्या मदतीने मुलीने पतीच्या ऑफिसमध्ये चौकशी केली परंतु महावीर अवस्थी नावाचा कुणीही अधिकारी आयकर खात्यात नसल्याचे तिला कळले. जेव्हा पत्नीने पतीला जाब विचारला तेव्हा तुला जे करायचे असेल ते कर अशी धमकी दिली. त्यानंतर सासरच्यांनी मुलीचा छळ करून तिला घराबाहेर काढले. 

दरम्यान, जेव्हा पोलीस आरोपीच्या गावात पोहचली तेव्हा तिथल्या गावकऱ्यांनी जबाब दिला. राधेश्याम अवस्थी यांचा मोठा मुलगा महावीर अवस्थी आयकर खात्यात अधिकारी आहे. दिल्लीत त्याचा बंगला आहे तर छोटा मुलगा ग्वाल्हेरमध्ये डॉक्टर आहे. परंतु गावातील तणावामुळे गावकऱ्यांनी लिखित जबाब नोंदवण्यास नकार दिला. या महिलेच्या तक्रारीवरून पोलिसांनी फसवणूक आणि हुंडा मागितल्याच्या आरोपात पती आणि सासरच्यांवर गुन्हा दाखल केला आहे. सध्या फसवणुकीच्या आरोपात महावीर अवस्थी दिल्लीतील जेलमध्ये बंद आहे.