तीन वेळा पतीचा जीव घेण्याचा केला प्रयत्न; चौथ्यांदा चिकन भात खायला देत कायमचा संपवला

लग्नाच्या काही दिवसानंतरच सुनीताने पतीचा काटा काढण्याचे ठरवले. त्यासाठी तिने त्याच्या हत्येचा कट रचला होता.

रायपूर - छत्तीसगडच्या बलरामपूर येथे एक हैराण करणारी घटना समोर आली आहे. याठिकाणी नवविवाहित पत्नीने लग्नाच्या १ महिन्यानंतरच पतीला किटकनाशक औषध पाजून मारले आहे. याआधी तीन वेळा पत्नीने पतीच्या हत्येचा प्रयत्न केला परंतु चौथ्या प्रयत्नात तिला यश आले. सध्या या आरोपी पत्नीला पोलिसांना अटक करून जेलमध्ये पाठवले आहे.

२२ वर्षीय बुदनाथचे ११ मे रोजी बलरामपूरच्या बिशनपूर इथल्या सुनीता नावाच्या मुलीशी लग्न झाले. लग्नानंतर काही दिवस सुनीता सासरी राहिली त्यानंतर ती माहेरी निघून गेली. सासरच्यांनी वारंवार बोलावूनही सुनीता तिच्या सासरी परतली नाही. त्यानंतर ५ जून रोजी पंचायत बोलवण्यात आली. त्यात झालेल्या निर्णयानंतर सुनीता तिच्या मर्जीविरोधात सासरी जावे लागले. परंतु पतीपासून सुटका व्हावी असा तिचा प्रयत्न होता. तिला पतीसोबत राहायचे नव्हते. सुनीताला मुलगा पसंत नव्हता तरीही तिच्या घरच्यांनी बुदनाथसोबत तिचे लग्न लावून दिले. 

लग्नाच्या काही दिवसानंतरच सुनीताने पतीचा काटा काढण्याचे ठरवले. त्यासाठी तिने त्याच्या हत्येचा कट रचला होता. याआधीही तीन वेळा सुनीताने तिच्या पतीला मारण्याचा प्रयत्न केला परंतु तिला यश आले नाही. पंचायतीच्या निर्णयानंतर सुनीता जेव्हा सासरी येत होती तेव्हा ती बाजारात गेली. तिथे कीटक मारण्यासाठी औषध खरेदी केले. त्यानंतर सासरी जाऊन तिच्या पतीसाठी चिकन भात बनवला आणि त्या जेवणात कीटकनाशक औषध मिसळले. या प्रकारात पतीचा मृत्यू झाला आहे. 

वर्दीचा धाक दाखवतात सत्य समोर आले

मुलाच्या मृत्यूप्रकरणी त्याच्या आईने पोलीस ठाण्यात तक्रार केली. त्या तक्रारीत मुलगा जेवण करून झोपला होता. त्यानंतर तो कधीच उठला नाही असं म्हटले. नातेवाईकांनी दिलेल्या तक्रारीच्या आधारे पोलिसांनी मृतकाच्या पत्नीला ताब्यात घेतले आणि चौकशी केली. पतीच्या मृत्यूबाबत पत्नी उडवाउडवीची उत्तरे देत होती. त्यात खाकी वर्दीचा धाक दाखवताच तिने तिचे काळे कृत्य उघड केले. सध्या महिलेला पोलिसांनी अटक करून जेलमध्ये पाठवले आहे. या प्रकरणाची आणखी चौकशी सुरू आहे.