Handshake with sand smugglers; Police personnel suspended | वाळू तस्करांशी हातमिळवणी; पोलीस कर्मचारी निलंबित

वाळू तस्करांशी हातमिळवणी; पोलीस कर्मचारी निलंबित

जळगाव : वाळु तस्करांसोबत हातमिळवणी करुन महसूलच्या पथकाने जप्त केलेले अवैध वाळु वाहतूक करणारे डंपर सोडायला लावल्याप्रकरणी जिल्हापेठ पोलीस ठाण्याचा कर्मचारी संदीप शालीग्राम पाटील याला शनिवारी पोलीस अधीक्षक डॉ.प्रवीण मुंढे यांनी निलंबित केले. या वृत्तास मुंढे यांनी लोकमतशी बोलताना दुजोरा दिला.


याबाबत सूत्रांनी दिलेली माहिती अशी की,  १५ ऑक्टोबर रोजी पहाटे तलाठी रुपेश ठाकूर, अनिरुद्ध खेतमाळस, संदीप धोबाड, सी.एच.किनगे, तहसिलदार यांचे वाहनचालक मनोज कोळी यांनी शहरातील पांडे चौकात अवैध वा वाहतूक करणारे डंपर (क्र.एम.एच १९ सी.वाय ३६०७) अडवले होते. डंपरचालकाने घडलेली घटना मालकास कळिवल्यानतर लागलीच जिल्हापेठ पोलिस ठाण्याचा कर्मचारी संदीप पाटील याने  पांडे चौकात जाऊन हे डंपर आपल्या यादीतील आहे, असे सांगून सोडवण्याचा प्रयत्न केला होता. पथकाने हे त्याला न जुमानता डंपर पोलीस ठाण्यात आणले, त्यानंतर  पाटील याने पोलीस ठाण्यात ठेवलेली डंपरची चावी काढून घेत चालकास देत निघून जाण्याचे सांगीतले होते. ठाणे अंमलदाराने हा सर्व प्रकार हाणुन पाडला होता.


दरम्यान,हा प्रकार उघड झाल्यानंतर पोलीस अधीक्षक डॉ. मुंढे यांनी संबधित कर्मचारी, पोलिस निरीक्षक अकबर पटेल यांची चौकशी केली. तहसिलदार यांच्याकडून संबधित प्रकारणाचा अहवाल मागवला होता. हा अहवाल प्राप्त झाल्यानंतर संदीप पाटील हा दोषी आढळल्याचे निष्पन्न झाले. प्राथमिक चौकशीअंती संदीप पाटील याला निलंबित करण्यात आले आहे. लोकेश महाजन (रा.जळगाव) हा या डंपरचा मालक तर मयुर दिनकर पाटील (रा. साकेगाव) हा डंपरचालक आहे. या डंपर मालकास तलाठींनी २ लाख ३९ हजार ११२ रुपयांचा दंड भरण्याची नोटीस दिली आहे.  

खाकीतील इतर वाळू माफियांचे काय?
पोलीस दलात अनेक जण आजही अवैध वाळूचा व्यवसाय करतात. तत्कालीन पोलीस अधीक्षक एस.जयकुमार यांनी या कर्मचाऱ्यांवर कारवाई केली होती, आजही त्यातील एक कर्मचारी पोलीस दलाचे काम कमी आणि वाळूचेच जास्त काम करतो. दुसऱ्याच्या नावावर वाहन घेऊन हे कर्मचारी कोट्याधीश झालेले आहेत. सतत राजकीय लोकांच्या संपकार्त राहून पगार पोलीस दलाचा घेतात अन‌् काम वाळमाफियांचे करतात, अशी स्थिती आहे. पोलीस अधीक्षक डॉ.मुंढे यांच्यासमोर पडद्याआड असलेल्या खाकीतील वाळू माफियांचा शोध घेऊन कारवाई करण्याचे आव्हान आहे.
 

Web Title: Handshake with sand smugglers; Police personnel suspended

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.