नाशिक : येथील यशवंतराव चव्हाण महाराष्ट्र मुक्त विद्यापीठाचे सेवानिवृत्त कुलसचिव नानासाहेब रावजी कापडणीस (७०) यांच्यासह त्यांचा पुत्र अमित कापडणीस (३५, दोघे रा. आनंद गोपाळ पार्क, जुनी पंडित कॉलनी) यांचा गेल्या डिसेंबर महिन्यात दोन टप्प्यात निर्घृणपणे हत्या करण्यात आल्याची धक्कादायक बाब पोलीस तपासातून उघडकीस आली. पोलिसांनी कापडणीस पिता-पुत्रांच्या हत्याकांडप्रकरणी मुख्य संशयित व्यावसायिक आरोपी राहुल गौतम जगताप (३६, रा. आनंद गोपाळ पार्क) यास बुधवारी (दि.१६) पोलिसांनी बेड्या ठोकल्या. त्याने पिता-पुत्रांचे मृतदेह दोन वेगवेगळ्या जिल्ह्यांमध्ये घेऊन जात पेटवून देत पुरावा नष्ट करण्याचा प्रयत्न केला.
शरणपूर रोडवरील जुन्या पंडित कॉलनीमध्ये राहणारे कापडणीस पिता-पुत्र हे मागील काही वर्षांपासून एकटेच राहत होते. पत्नी व मुलगी नोकरीनिमित्त मुंबईत वास्तव्यास होते. अमित कापडणीस याने एम.बी.बी.एस.चे शिक्षण पूर्ण केले असून, तो कुठल्याही प्रकारची वैद्यकीय सराव करत नव्हता. दोघेही पिता-पुत्र एकाकी जीवन जगत होते. त्यांच्याच आनंद गोपाळ पार्क नावाच्या अपार्टमेंटमध्ये राहणाऱ्या राहुल याने त्यांच्यावर ‘वॉच’ ठेवून अमितसोबत मैत्री केली. मैत्रीतून त्याने त्यांच्या स्थावर व जंगम मालमत्तेविषयी तसेच बँक, शेअर मार्केट, डिमेट खात्यातील गुंतवणूकविषयीची माहिती जाणून घेतली. गडगंज संपत्ती असल्याचे लक्षात आल्यानंतर राहुल याने थंड डोक्याने कापडणीस पिता-पुत्रांच्या हत्येचा कट रचल्याने पोलीस उपायुक्त अमोल तांबे यांनी पत्रकार परिषदेत बुधवारी (दि.१६) सांगितले.
दरम्यान, कापडणीस यांच्या पत्नी, मुलगी हे मुंबईत वास्तव्यास असून, मागील काही महिन्यांपासून नाशिकस्थित पिता-पुत्रांच्या त्या संपर्कात नव्हत्या. दरम्यान, भाऊ अमितचा फोन लागत नाही व वडिलांचा फोन दुसऱ्याच कोणत्या तरी व्यक्तीकडे असून, त्याने फोन घेत उडवाउडवीची उत्तरे दिल्याने कापडणीस यांची कन्या शीतल यांनी नाशिक गाठले. यावेळी त्यांनी पुन्हा नानासाहेब कापडणीस यांच्या मोबाईलवर फोन केला असता, संशयित राहुल याने तो उचलला आणि शीतल यांची भेट घेतली. त्याने शीतल यांना ‘बंगल्याचे काम सुरू असल्यामुळे तुमचे वडील, भाऊ हे देवळाली कॅम्प येथील रो-हाऊसमध्ये शिफ्ट झाले आहे’ असे सांगितले. त्याच्या बोलण्याचा विश्वास करत शीतल या पुन्हा माघारी मुंबईला निघून गेल्या. यामुळे कापडणीस पिता-पुत्र बेपत्ता झाल्याची माहिती पोलिसांपर्यंत उशिराने पोहचली. पोलिसांनी राहुल यास न्यायालयात हजर केले असता, न्यायालयाने १० दिवसांची पोलीस कोठडी सुनावली.