कौटुंबिक वादाचा रक्तरंजित अंत! मोठ्या भावाच्या मेहुणीवर जडले प्रेम; संतापलेल्या भावाने धाकट्याचा काटा काढला

कर्नाटकच्या तुमकूरमध्ये अनैतिक संबंधाच्या आरोपावरून मोठ्या भावाने आणि वडिलांनी मिळून धाकट्या भावाची हत्या केली. अपघाताचा बनाव रचला तरी पोलिसांनी गुपित उघड केले.

रक्ताच्या नात्याला काळीमा फासणारी एक संतापजनक घटना कर्नाटकच्या तुमकूर शहरात उघडकीस आली आहे. मोठ्या भावाच्या मेहुणीशी असलेल्या कथित प्रेमसंबंधांतून उद्भवलेल्या वादाचे रूपांतर हत्येत झाले. मोठ्या भावाने आपल्या वडिलांच्या मदतीने धाकट्या भावाचा क्रूरपणे बळी घेतला. स्टालिन असे मृत तरुणाचे नाव असून, या प्रकरणी पोलिसांनी त्याचा मोठा भाऊ नवीन आणि वडील जॉन पॉल यांना बेड्या ठोकल्या आहेत.

एका आरोपाने संसाराची राखरांगोळी

पोलिसांनी दिलेल्या माहितीनुसार, जॉन पॉल यांना नवीन आणि स्टालिन ही दोन मुले होती. नवीनचे लग्न झाले असून त्याची पत्नी सध्या गरोदर आहे. दुसरीकडे, स्टालिनचा जेनिफर नावाच्या तरुणीशी साखरपुडा झाला होता. लग्नाची तयारी सुरू असतानाच जेनिफरने लावलेल्या एका आरोपामुळे कुटुंबात खळबळ उडाली. स्टालिनचे त्याच्या मोठ्या भावाच्या मेहुणीशी आणि खुद्द नवीनच्या पत्नीशीही अवैध संबंध असल्याचा दावा जेनिफरने केला. यावरून घरात गेल्या आठवड्याभरापासून सतत खटके उडत होते.

अपघाताचा बनाव फसला

२२ मार्च रोजी वादाने टोक गाठले आणि संतापलेल्या नवीनने वडील जॉन पॉल यांच्या साथीने स्टालिनवर जीवघेणा हल्ला केला. गुन्हा लपवण्यासाठी आरोपींनी स्टालिनला सिद्धगंगा रुग्णालयात दाखल केले आणि एक खोटी कथा रचली. "बाईक उभी करताना तो पडला आणि रेलिंगला आदळल्याने त्याच्या पोटाला दुखापत झाली," असे त्यांनी डॉक्टरांना सांगितले. मात्र, पाच दिवसांच्या उपचारांनंतर स्टालिनचा मृत्यू झाला.

पोलिसी खाक्या दाखवताच सत्य बाहेर

जयनगर पोलिसांनी मृतदेहाची तपासणी केली असता त्यांना स्टालिनच्या शरीरावरील जखमा अपघाताच्या नसून शस्त्राने केलेल्या वार असल्याचा संशय आला. पोलिसांनी सुरुवातीला वडील जॉन पॉल यांची उलटतपासणी केली. सुरुवातीला त्यांनी पोलिसांची दिशाभूल करण्याचा प्रयत्न केला, मात्र पोलिसी खाक्या दाखवताच त्यांनी हत्येची कबुली दिली. स्वतःच्याच मुलाच्या हत्येत बापाने मोठ्या मुलाची साथ दिल्याने परिसरात हळहळ व्यक्त होत आहे.