जयपूर - राजस्थानमधील अलवर जिल्ह्यातील भिवानीमध्ये एक विचित्र आणि कौटुंबिक हिंसाचाराचा धक्कादायक प्रकार समोर आला आहे. येथे राहणाऱ्या एका शाळेच्या प्रिंसिपलनी त्यांच्या पत्नीवर गंभीर आरोप केले आहेत. पत्नी आपल्याला तवा, दांडक्यांनी मारहाण करते, असे त्यांनी कोर्टात सांगितले आहे. तसेच आपल्या आरोपांना पुरावे मिळावेत म्हणून त्यांनी घरात सीसीटीव्ही कॅमेरे लावले होते. या कॅमेऱ्यांमध्ये दिसत असलेले चित्रिकरण पाहून सर्वांना धक्का बसला आहे. या प्रिंसिपलना त्यांची पत्नी दररोज मारहाण करून घराबाहेर काढते. एवढेच नाही तर केसमध्ये अडवण्याची धमकी देऊन ब्लॅकमेल करते, असे या पीडित प्रिंसिपलनी कोर्टात सांगितले. आता या प्रिंसिपलनी कोर्टात सुरक्षा देण्यासाठी विनंती केली आहे. तसेच आता कोर्टाने त्यांना संरक्षण देण्याचे आदेश दिले आहेत.
सर्वसाधारणपणे कौटुंबिक हिंसाचाराचे आरोप हे महिलांकडून केले जातात. मात्र भिवानीमध्ये पुरुषच कौटुंबिक हिंसाचाराची शिकार झाल्याची धक्कादायक बाब समोर आली आहे. कौटुंबिक हिंसाचाराची शिकार झालेले अजित सिंह यादव हे प्रिंसिपल आहेत. त्यांनी हरियाणामधील सोनिपत येथील सुमन हिच्याशी लव्ह मॅरेज केले होते. त्यानंतर काही दिवसांपर्यंत त्यांच्या जीवनात सारं काही सुरळीत सुरू होते. मात्र हळूहळू पत्नीने तिचं खरं रूप दाखवलं. तसेच ती पतीवर अत्याचार करू लागली. अखेर त्रस्त प्रिंसिपल यांनी आता भिवाडी न्यायालयामध्ये आपल्या सुरक्षेची मागणी करत न्याय देण्याची विनंती केली.
पत्नीकडून होत असलेल्या मारहाणीमध्ये पती अजित सिंह यांना शरीरावर अनेक ठिकाणी जखमा झाल्या आहेत. मात्र लोकलाजेस्तव आणि शिक्षकी पेशाचा गरिमा विचारात घेऊन ते इकडे तिकडे उपचार करून घेत होते. मात्र सर्व हद्द ओलांडली गेली तेव्हा त्यांनी कोर्टात धाव घेतली. अजित सिंह यांना एक मुलगाही आहे. त्यांनी पुरावा म्हणून सीसीटीव्ही फुटेज कोर्टात सादर केले. त्यामध्ये सुमन ही मुलासमोरच पती अजित सिंह यांना मारहाण करताना दिसत आहे. मात्र आपल्या शिक्षकी पेशाचा विचार करून अजित सिंह यांनी कधीही पत्नीविरोधात हात वर उचलला नाही. मात्र या सर्व प्रकारामुळे अजित सिंह मानसिकदृष्ट्या आजारी पडले आहेत. दरम्यान, सुमन ही तिच्या अमेरिकेतील भावाच्या सांगण्यावरून सारं काही करते, असा आरोप अजित सिंह यांनी केला आहे.