धक्कादायक! गटारात आढळले मृतदेहाचे तुकडे; शिर, धड शोधण्यासाठी पोलिसांची पथके, परिसरात खळबळ

Crime News : परिसरात दिवसा मोठी वर्दळ असते त्यामुळे रात्रीच्या वेळी हा प्रकार घडला असल्याची शक्यता वर्तवली जात आहे.

नवी मुंबई - एपीएमसीमधील दाणाबंदर आवारातील गटारात प्लास्टिकच्या पिशवीत अज्ञात व्यक्तीच्या मृतदेहाचे तुकडे आढळून आले आहेत. त्यात केवळ हात व पायाचा समावेश असल्याने उर्वरित धड व शिर कुठे टाकले असावेत याचा पोलीस तपास करत आहेत. सदर परिसरात दिवसा मोठी वर्दळ असते त्यामुळे रात्रीच्या वेळी हा प्रकार घडला असल्याची शक्यता वर्तवली जात आहे.

एपीएमसीमधील दाना बंदर ते माथाडी भवन दरम्यानच्या मार्गालगत असलेल्या गटारात हे मृतदेहाचे तुकडे आढळून आले आहेत. त्याठिकाणी दुर्गंधी येत असल्याची तक्रार पोलिसांकडे आली होती. त्यानुसार पोलिसांनी परिसरात शोधाशोध केली असता एका गरामध्ये प्लास्टिकची पिशवी आढळून आली. ही पिशवी पोलिसांनी उघडली असता त्यामध्ये अज्ञात व्यक्तीचे हात व पाय आढळून आले. यावरून सदर व्यक्तीची हत्या करून पुरावे नष्ट करून ओळख लपवण्यासाठी मृतदेहाचे तुकडे त्याठिकाणी टाकण्यात आल्याचे स्पष्ट झाले आहे. 

हाती लागलेल्या मृतदेहाच्या तुकड्यांवरून मृत व्यक्तीचे वय सुमारे ३० ते ४० वर्षे असल्याची शक्यता पोलिसांनी वर्तवली आहे. त्याच्या डाव्या पायाच्या अंगठ्यात काळा धागा बांधलेला आहे. मात्र अवघ्या हात व पायाच्या तुकड्यावरून त्याची ओळख पटवण्याची आव्हान पोलिसांपुढे आहे. तर मृतदेहाचे उर्वरित तुकडे कुठे टाकले असावेत याच्या शोधासाठी एपीएमसी पोलीसांनी परिसर पिंजून काढला. यानंतरही काहीच काही लागले नसल्याने पोलिसांपुढे तपासाचे आव्हान तयार झाले आहे. 

पिशवीतून आणलेले मृतदेहाचे तुकडे रात्रीच्या सुमारास त्याठिकाणी टाकले असावेत अशी शक्यता आहे. त्यानुसार सीसीटीव्हीच्या माध्यमातून या मार्गाने प्रवास केलेल्या वाहनाचा पोलीस शोध घेत आहेत. त्याशिवाय शहरातून एखादी व्यक्ती बेपत्ता आहे का याचाही तपास करत आहेत. मात्र या घटनेमुळे परिसरात खळबळ उडाली आहे. त्यामुळे घटनेची माहिती मिळताच गुन्हे शाखेच्या पथकासह श्वान पथक देखील घटनास्थळी दाखल झाले होते. या घटनेच्या अनुशंगाने एपीएमसी पोलीस व गुन्हे शाखा पोलिसांची वेगवेगळी पथके तयार करण्यात आली आहेत. 

परिसरातून दुर्गंधी येत असल्याच्या तक्रारीमुळे पाहणी दरम्यान गटारात प्लॅस्टिकची पिशवी आढळून आली. त्यामध्ये अज्ञात पुरुषाचे हात व पाय तुकडे केलेल्या अवस्थेत आढळून आले आहेत. मृतदेहाच्या उर्वरित तुकड्यांचा शोध सुरू असून गुन्हेगारांचा देखील शोध सुरू आहे. 

विकास रामुगडे, वरिष्ठ पोलीस निरीक्षक- एपीएमसी पोलीस ठाणे.