"तुमच्या भांडणामुळे आपली बदनामी होते"; वाद मिटवणाऱ्या पुतण्याची काकाकडून निर्घृण हत्या, गाव हादरलं

बुलढाण्यात सख्ख्या काकानेच पुतण्याची निर्घृणपणे हत्या केल्याची घटना समोर आली आहे.

Buldhana Crime: सख्ख्या काका-काकूंमधील भांडण सोडवून त्यांना शांत राहण्याचा सल्ला देणे एका २४ वर्षीय तरुणाच्या जीवावर बेतले आहे. किरकोळ वादाचा राग मनात धरून नराधम काकाने झोपेत असलेल्या पुतण्यावर कुऱ्हाडीने सपासप वार करून त्याची निर्घृण हत्या केली. बुलढाण्याच्या चिखली तालुक्यातील हातणी येथे बुधवारी रात्री ११ वाजेच्या सुमारास ही रक्तरंजित घटना घडली. गोपाल अजाबराव जाधव असे मृत पुतण्याचे नाव असून, पोलिसांनी आरोपी काका विनोद रामचंद्र जाधव ऊर्फ मंत्री याला अवघ्या दोन तासांत बेड्या ठोकल्या आहेत.

नेमकं प्रकरण काय?

मिळालेल्या माहितीनुसार, आरोपी विनोद जाधव याचे बुधवारी सायंकाळी त्याच्या पत्नीसोबत जोरदार भांडण झाले होते. काका-काकूंमधील हे सततचे वाद पाहून पुतण्या गोपाल याने मध्यस्थी केली. "तुमच्या रोजच्या भांडणामुळे समाजात आपली बदनामी होते, तुम्हाला वादच करायचे असतील तर या घरात राहू नका," अशा शब्दांत गोपालने दोघांनाही खडसावले होते. आपल्याच पुतण्याने आपल्याला सुनावले, याचा तीव्र राग आरोपी विनोदच्या मनात सलत होता.

झोपेतच केला पुतण्याचा घात

रात्री ११ वाजेच्या सुमारास गोपाल घरामध्ये लोखंडी पलंगावर गाढ झोपलेला होता. याच संधीचा फायदा घेत खुनशी काका विनोद याने कुऱ्हाड हाती घेतली. त्याने झोपलेल्या गोपालच्या डोक्यावर, चेहऱ्यावर आणि छातीवर कुऱ्हाडीच्या उलट्या बाजूने आणि पात्याने सपासप प्रहार केले. गोपालने जीवाच्या आकांताने ओरडण्याचा प्रयत्न केला, पण वार इतका भीषण होता की त्याचा जागीच मृत्यू झाला.

मक्याच्या शेतात लपला, पण पोलिसांनी पकडलं

घटनेनंतर परिसरात एकच खळबळ उडाली. माहिती मिळताच चिखली पोलीस ठाण्याचे पथक तातडीने गावात दाखल झाले. पोलीस येत असल्याचे समजताच आरोपी विनोद अंधाराचा फायदा घेत मक्याच्या शेतात जाऊन लपला. मात्र, जिल्हा पोलीस अधीक्षक निलेश तांबे आणि ठाणेदार भूषण गावंडे यांच्या मार्गदर्शनाखाली पोलिसांनी शोध मोहीम राबवून अवघ्या दोन तासांत मारेकऱ्याला शेतातून ओढून काढले.

न्यायालयाने सुनावली पोलीस कोठडी

चिखली पोलिसांनी आरोपी विनोद जाधवला अटक करून न्यायालयात हजर केले असता, त्याला एक दिवसाची पोलीस कोठडी सुनावण्यात आली आहे. पोटच्या मुलाप्रमाणे असलेल्या पुतण्याची अशा प्रकारे हत्या झाल्याने संपूर्ण जिल्ह्यात संताप व्यक्त होत आहे. चिखली पोलीस या प्रकरणाचा अधिक तपास करत असून, घरगुती वादाचे रूपांतर अशा भीषण हत्याकांडात झाल्याने हातणी गावावर शोककळा पसरली आहे.