मुंबई : बिसलेरी कंपनीचे सीईओ आणि दोन अधिकाऱ्यांवर अज्ञातांकडून हल्ला झाल्याची घटना घडली आहे. कंपनीचे सीईओ, एचआर हेड आणि मार्केटिंग हेड हे गुरुवारी अंधेरी (पूर्व) येथील एका हॉटेलमध्ये जेवण करून कामावर परतत असताना चार अज्ञात व्यक्तींनी लोखंडी रॉड आणि पाईपने त्यांच्यावर हल्ला केला. याप्रकरणी अंधेरी पोलिसांनी अज्ञात व्यक्तींविरुद्ध एफआयआर नोंदवला आहे.
दरम्यान, हल्लेखोर युनियनचे असू शकतात आणि काही अंतर्गत बाबींमुळे ही घटना घडली असावी, असा संशय व्यक्त करण्यात येत आहे. याप्रकरणी अंधेरी पोलिसांनी अद्याप कोणालाही अटक केलेली नाही. तसेच, हल्लेखोरांची ओळख पटवण्यासाठी आणि त्यांना शोधण्यासाठी पोलिसांकडून परिसरातील क्लोज सर्किट टेलिव्हिजन (सीसीटीव्ही) द्वारे स्कॅन करण्यात येत आहे.
एचआर हेड समीर गायकवाड यांनी तक्रारीत म्हटले आहे की, "ऑफिसच्या बैठकीनंतर मी कंपनीचे सीईओ अँजेलो जॉर्ज आणि मार्केटिंग हेड तुषार मल्होत्रा यांच्यासोबत जवळच्या रेस्टॉरंटमध्ये जेवणासाठी निघालो. दुपारी 2.50 वाजता आम्ही ऑफिसला परतत असताना चार जण आमच्या जवळ आले. त्यांनी तोंडाला मास्क लावला होता. आम्हाला काही कळायच्या आधीच त्यांनी आमच्यावर लोखंडी रॉड आणि पाईपने मारहाण करण्यास सुरुवात केली. मी जखमी अवस्थेत जमिनीवर पडल्याने माझ्या दोन सहकाऱ्यांनी हल्लेखोरांना थांबवण्याचा प्रयत्न केला पण त्यांनाही हाणामारीत दुखापत झाली."
याचबरोबर, एफआयआरमध्ये समीर गायकवाड यांनी सांगितले की, मदतीसाठी आरडाओरडा केला. त्यावेळी घटनास्थळी गर्दी जमू लागल्याने हल्लेखोरांनी तेथून पळ काढला. दरम्यान, समीर गायकवाड यांनी रुग्णालयात उपचार घेतल्यानंतर पोलिसांशी संपर्क साधून चारही आरोपींबद्दल माहिती दिली. तसेच, पोलीस या हल्ल्यामागील हेतू शोधण्यासाठी गायकवाड आणि कार्यालयातील इतरांकडून माहिती गोळा करत आहेत. या हल्ल्यामागे वैयक्तिक किंवा व्यावसायिक कारण आहे का, याचा तपास सुरू आहे, असे अंधेरी पोलिस ठाण्याच्या एका पोलिस अधिकाऱ्याने सांगितले.