भोजपुरी सुपरस्टार पवन सिंहच्या (Pawan Singh) अडचणीत आता वाढ झाली आहे. पवन सिंहची पत्नी ज्योती सिंहने अभिनेत्याविरोधात पोलिसात तक्रार दाखल केली आहे. ज्योतीने पवनवर मानसिक छळ केल्याचा आरोप केला आहे. याशिवाय अनेक गंभीर आरोप देखील केले आहेत. पवन सिंहने तिला गर्भपात करण्यास भाग पाडले आणि त्याचवेळी तिला आत्महत्येस प्रवृत्त केले, असा दावा ज्योती सिंहने केला आहे. या घटनेने एकच खळबळ उडाली आहे.
बलिया पोलीस स्टेशनचे इन्चार्ज इन्स्पेक्टर प्रवीण कुमार सिंह यांनी रविवारी दिलेल्या माहितीनुसार, ज्योतीच्या वतीने तक्रार दाखल करण्यात आली आहे. ते सध्या या प्रकरणाचा तपास करत आहेत. दुसरीकडे, पवन सिंह कॉललाही उत्तर देत नाही. पोलीस तक्रारीत ज्योती सिंहने म्हटले आहे की, '2018 मध्ये त्यांच्या लग्नानंतर लगेचच पवन सिंहची आई आणि बहिणीने ज्योतीला तिच्या लूकवरून टोमणे मारायला सुरुवात केली. पवन सिंहच्या आईनेही माहेरच्यांकडून 50 लाख रुपये हडप केले होते.
तक्रारीनुसार, पवन सिंहची आई ज्योतीला रोजच शिवीगाळ करत असे. गरोदरपणात पवन सिंहच्या कुटुंबीयांनी तिला अशी औषधे दिली होती, ज्यामुळे तिचा गर्भपात झाला.' ज्योतीने पुढे सांगितले की, पवन सिंह आणि त्याच्या कुटुंबीयांनी तिचा मानसिक छळ करण्यासोबतच तिला आत्महत्या करण्यास प्रवृत्त केले. ज्योतीच्या अर्जावर पवन सिंहला 5 नोव्हेंबरला न्यायालयात हजर राहण्याची नोटीसही बजावण्यात आली आहे.
पवनने ज्योतीकडे मर्सिडीजची देखील मागणी केली होती. तिने गंभीर आरोप केले असून तिच्याकडे यासंबंधी सर्व पुरावे देखील आहेत. पवन सिंह हा भोजपुरी चित्रपटातील एक लोकप्रिय अभिनेता आहे. आपल्य़ा अभिनयासोबतच तो नेहमी पर्सनल लाईफमुळे चर्चेत असतो. त्याच्या पहिल्या पत्नीने सुसाईड केलं असून ज्योती त्याची दुसरी पत्नी आहे. पण आता ज्योतीने गंभीर आरोप केल्यामुळे तो वादात सापडला आहे. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"