बाईकवरुन पाठलाग करत आले, महिला थांबताच उतरले अन्... दिवसाढवळ्या चेन स्नॅचिंगचा प्रयत्न फसला

कर्नाटकात दिवसाढवळ्या महिलेची सोन्याची साखळी हिसकावण्याचा प्रयत्न झाला.

Chain Snatching Attempt in Karnataka: कर्नाटकमध्ये चेन स्नॅचिंगचा धक्कादायक प्रकार समोर आला आहे. कर्नाटकच्या कोलार जिल्ह्यातील मुलबागिलू शहरात दिवसाढवळ्या एका महिलेला चेन हिसकावण्याचा प्रयत्न करण्यात आला. महिलेने तिची स्कूटी थांबवली तेव्हा दुचाकीवरून आलेल्या दोन अज्ञात हल्लेखोरांनी तिच्यावर हल्ला केला. एका आरोपीने महिलेला धक्का देऊन खाली पाडलं आणि तिची चेन हिसकावण्याचा प्रयत्न करू लागला. हा सगळा धक्कादायक प्रकार सीसीटीव्ही कॅमेरात कैद झाला आहे.

कोलार जिल्ह्यातील संजप्पा बरंगे परिसरात ही घटना घडली. दिवसाढवळ्या घडलेल्या या घटनेमुळे परिसरामध्ये दहशतीचे वातावरण आहे. बाईकवरुन आलेल्या दोघांनी स्कूटीवरील महिलेचा पाठलाग केला आणि तिच्या गळ्यातील हार हिसाकवण्याचा प्रयत्न केला. यावेळी चोरट्याची आणि पीडित महिलेची झटापट देखील झाली. ही संपूर्ण घटना सीसीटीव्हीमध्ये कैद झाली असून पोलीस आरोपींचा शोध घेत आहेत.

महिलेने आरडा ओरड केल्यामुळे आजूबाजूच्या परिसरातील लोक तिथे जमू लागले. लोक येत असल्याचे पाहून आरोपींनी ताबडतोब घटनास्थळावरून पळ काढला. सुदैवाने महिलेला गंभीर दुखापत झाली नाही. तसेच चोरट्यांचा सोन्याचा नेकलेस चोरण्याचाही प्रयत्न फसला. सीसीटीव्ही फुटेजनुसार आरोपी दूरवरून महिलेचा पाठलाग करत होते.

व्हिडिओमध्ये आरोपी स्पष्ट दिसत आहेत. पोलिसांनी सीसीटीव्ही फुटेज ताब्यात घेतले आहे आणि तपास सुरू केला आहे. ही एक अयशस्वी चेन स्नॅचिंग घटना होती. महिलेच्या ओरडण्यामुळे आणि लोक जमल्यामुळे आरोपी पळून गेला. या प्रकरणात एफआयआर दाखल करण्यात आला आहे आणि तपास सुरू आहे. अद्याप कोणालाही अटक करण्यात आलेली नाही परंतु आरोपीची ओळख पटवून लवकरच त्यांना पकडले जाईल, असं एसपी निखिल बी म्हणाले.

दरम्यान, या घटनेनंतर स्थानिक लोकांमध्ये भीतीचे वातावरण आहे. पोलिसांनी गस्त वाढवावी आणि परिसरात सुरक्षा वाढवावी अशी मागणी ते करत आहेत. लवकरच गुन्हेगारांना अटक केली जाईल असे पोलिसांचे म्हणणे आहे.