७ कोटींची कॅश, ११० कोटींचे व्यवहार; त्रेहान ग्रुपच्या १९ ठिकाणी ३ दिवस छापेमारी, काय सापडलं?

छाप्यादरम्यान, आयकर विभागाने ७ कोटी रुपयांची रोकड आणि १० कोटी रुपयांचे दागिनेही जप्त केले आहेत.

त्रेहान ग्रुपविरुद्ध सुरू असलेली आयकर विभागाची कारवाई जवळजवळ पूर्ण झाली आहे. या तीन दिवसांच्या कारवाईदरम्यान, पथकाने पेन ड्राइव्ह, लॅपटॉप, संगणक, एग्रीमेंट, स्लिप, मोबाईल इत्यादींसह सर्व प्रकारचे पुरावे गोळा केले आहेत. यासह, सुमारे ११० कोटी रुपयांचे व्यवहार आढळून आले आहेत. छाप्यादरम्यान, आयकर विभागाने ७ कोटी रुपयांची रोकड आणि १० कोटी रुपयांचे दागिनेही जप्त केले आहेत. आयकर विभागाच्या पथकाने सर्व कागदपत्रे जप्त केली आहेत आणि आता ते त्रेहान ग्रुपकडून दंड वसूल करण्याची प्रक्रिया सुरू करण्याची तयारी करत आहेत. 

गुरुग्राम, फरीदाबाद, अलवर, भिवाडी आणि जयपूर येथील त्रेहान ग्रुपच्या १९ ठिकाणी आयकर विभागाने छापे टाकले. तीन दिवस चाललेल्या या कारवाईदरम्यान, विभागातील १५० हून अधिक कर्मचारी तपासात गुंतले होते. या कालावधीत आयकर विभागाच्या पथकाने गुरुग्राम, फरीदाबाद आणि अलवर येथून ७ कोटी रुपये रोख आणि १० कोटी रुपयांचे दागिने जप्त केले आहेत.

तीन दिवसांच्या कारवाईत सर्व संचालकांची चौकशी करण्यात आल्याचे आयकर विभागाच्या अधिकाऱ्यांनी सांगितले. ग्रुपचे ऑफिस, डायरेक्टरचे घर, ऑफिस, जवळचे लोक आणि नातेवाईक याबद्दल माहिती गोळा करण्यात आली. त्यांच्या घरातून जप्त केलेल्या पेन ड्राइव्ह, एग्रीमेंट, लॅपटॉप, संगणक, स्लिपमधून सुमारे ११० कोटी रुपयांचे व्यवहार उघडकीस आले आहेत. हा आकडा आणखी वाढू शकतो. आयकर विभागाचे अधिकारी मूल्यांकनात व्यस्त आहेत.

सर्व ठिकाणांहून सापडलेली कागदपत्रे जप्त करण्यात आली आहेत, असं विभागाच्या अधिकाऱ्यांनी सांगितलं. त्याची चौकशी सुरू आहे. आयकर विभागाचे तज्ज्ञ तपास करत आहेत. ११० कोटी रुपयांच्या रोख व्यवहाराप्रकरणी त्रेहान ग्रुपला दंड आकारला जाईल. त्रेहान ग्रुपकडून किती रक्कम वसूल करायची आहे हे एक ते दोन दिवसांत ठरवलं जाईल. अधिकाऱ्यांनी सांगितलं की, ही संपूर्ण कारवाई विभागाला बऱ्याच काळापासून मिळत असलेल्या माहितीच्या आधारे करण्यात आली आहे. विभागाला मिळालेल्या माहितीपेक्षा कितीतरी पट जास्त किमतीचे व्यवहार समोर आले आहेत.