पिंपरी : भाजप प्रदेशाध्यक्ष चंद्रकात पाटील यांचा पी. ए. बोलत असल्याचे सांगून २५ लाखांची खंडणी मागणाऱ्या मुख्य सुत्रधार व त्याचा साथीदारास पोलिसांनी जेरबंद केले. मोबाइल लोकेशनवरून माग काढून त्यांना पुणे येथून ताब्यात घेऊन अटक केली. निगडी पोलिसांनी ही कामगिरी केली.
या प्रकरणातील मुख्य सुत्रधार विशाल अरुण शेंडगे (सध्या रा. कोंढवा, मूळ रा. लोहियानगर) व त्याचा साथीदार किरण धन्यकुमार शिंदे (रा. लोहियानगर) असे अटक केलेल्या आरोपींची नावे आहेत. तसेच यापूर्वी पोलिसांनी सौरभ संतोष अष्टूळ (वय २१, रा. गंजपेठ, पुणे) याला पोलिसांनी अटक केली आहे.
पोलिसांनी दिलेल्या माहितीनुसार, निगडी येथील एका नामांकित रुग्णालयात आरोपी यांनी १८ जुलै रोजी दुपारी चारच्या सुमारास फोन केला होता. मी चंद्रकात दादा पाटील यांच्या आॅफीसमधून दादांचा पी. ए. सांवत बोलतोय. कोरोनाच्या महामारीमुळे गरिबांची अवस्था बिकट झाली आहे. त्यांच्या मदतीसाठी ताबडतोब २५ लाख रूपये आमच्या पर्वतीच्या कार्यकर्त्याकडे पाठवून द्या, नाहीतर तुमचे हातपाय तोडून जिवे मारून टाकीन, अशी धमकी दिली होती. याप्रकरणी निगडी पोलीस ठाण्यात गुन्हा दाखल केला. आरोपीच्या मोबाइल टॉवर लोकेशनची माहिती मिळविली. तो फोन येरवडा येथील नारळपाणी विक्रेत्याच्या मुलीचा असल्याचे समोर आले. सदरचा मोबाईल क्रमांक माझ्या वडिलांचा असून त्याचे सिमकार्ड २९ जून रोजी चोरीला गेले आहे, असे मुलीने सांगितले. संबंधित मुलगी व तिचे वडील आरोप नसल्याचे चौकशीत समोर आले. आरोपी यांनी सदरच्या क्रमांकावरून पुण्यातील काही जणांना फोन करून त्यांच्याकडे देखील चंद्रकात दादा पाटील यांच्या कार्यालयातून बोलतो म्हणून वरील कारणाने पैशाची मागणी केल्याचे समोर आले. त्यातील एका व्यापाऱ्याला आरोपी यांना फोन करण्यास सांगून पैसे घेऊन जाण्यास सांगितले. त्यानुसार सापळा लावून पोलिसांनी आरोपी सौरभ अष्टूळ याला पकडले. त्याच्याकडे चौकशी केली असता आरोपी विशाल शेंडगे मुख्य सूत्रधार असून आरोपी किरण शिंदे याचाही या गुन्ह्यात समावेश असल्याचे समोर आले.
पोलिसांनी आरोपींचा शोध सुरू केला. मात्र आरोपी पुण्यात लपून असल्याचे समोर आले. त्यामुळे पोलिसांनी त्यांच्या नातेवाईकांचा शोध घेतला. त्यांना आरोपींशी संपर्क साधण्यास सांगून त्यांना भेटण्यास बोलाविले. भेटायला येते, असे आरोपी यांनी सांगितले. मात्र नातेवाईक व पोलिसांनी दिवसभर प्रतीक्षा करूनही आरोपी भेटायला आले नाहीत. त्यामुळे पोलिसांनी मोबाइल लोकेशनवरून आरोपी यांचा माग काढला. त्यानंतर त्यांना गुरुवारी (दि. २३) रात्री पुणे येथून ताब्यात घेतले व निगडी पोलीस ठाण्यात आणून चौकशी करून अटक केली. चंद्रकात दादा पाटील यांचा पी. ए. बोलतोय, असे सांगून आरोपी यांनी पुण्यातील काही नागरिकांना पैसे मागितल्याचे उघडकीस आले. आरोपी विशाल शेंडगे याच्या विरोधात कोथरूड, कोंढवा व पौड व समर्थ पोलीस ठाण्यात गुन्हे दाखल आहेत. आमदार चंद्रकात पाटील,आमदार बाबर, आमदार निम्हण यांचे नाव घेऊन पैसे मागितल्याने खंडणीचे व फसवणुकीचे गुन्हे दाखल असल्याची माहिती समोर आली आहे. निगडी पोलीस ठाण्याचे वरिष्ठ पोलीस निरीक्षक गणेश जवादवाड, सहायक पोलीस निरीक्षक लक्ष्मण सोनवणे, पोलीस उपनिरीक्षक ज्ञानेश्वर कोकाटे, महेंद्र आहेर, पोलीस कर्मचारी किशोर पढेर, मच्छिंद्र घनवट, सतीश ढोले, विलास केकाण, सुनील जाधव, रमेश मावसकर, आत्मलिंग निंबाळकर, सोपान बोधवड, भुपेंद्र चौधरी, विनोद व्होनमाने, विजय बोडके, तुषार गेंगजे, राहुल मिसाळ, अमोल सांळूखे, दीपक जाधवर, तानाजी सोनवणे यांच्या पथकाने ही कामगिरी केली.