सासूला संपवण्यासाठी ७२ तास आधीच रचलेला कट; भाडेकरूच्या प्रेमात पडलेल्या सुनेने काय-काय केलं.. 

आरोपी राजन शर्मा हा ३ वर्षांपूर्वी निर्मला देवी यांच्या घरात भाडेकरू म्हणून आला होता. अवघ्या काही महिन्यांतच घरमालकाची पत्नी रंजना आणि राजन यांच्यात प्रेमसंबंध निर्माण झाले.

उत्तर प्रदेशची राजधानी लखनऊमधील महानगर परिसरात झालेल्या निर्मला देवी या वृद्ध महिलेच्या हत्येचे गूढ पोलिसांनी उकलले आहे. ही केवळ लूटमार किंवा अपघाती घटना नव्हती, तर सुनेने आपल्या भाडेकरू प्रियकरासोबत मिळून केलेला खून होता. विशेष म्हणजे, या हत्येची ब्लू-प्रिंट ३ दिवस आधीच तयार करण्यात आला होत, अशी धक्कादायक माहिती पोलीस तपासात समोर आली आहे.

३ महिन्यांचे प्रेम आणि ३ दिवसांचा कट

२१ मार्च रोजी निशातगंज येथील गल्ली नंबर ३ मध्ये ६९ वर्षीय निर्मला देवी यांचा मृतदेह आढळला होता. सुरुवातीला ही घटना लूटमारीची वाटत होती, कारण अंगावरील दागिने गायब होते. मात्र, डॉग स्क्वाड आणि बंद सीसीटीव्ही कॅमेऱ्यांच्या संशयास्पद हालचालींमुळे अवघ्या २४ तासांत सून रंजना आणि तिचा प्रियकर राजन शर्मा यांचा पर्दाफाश झाला. २२ मार्च रोजी पोलिसांनी दोघांनाही अटक करून तुरुंगात धाडले आहे.

आरोपी राजन शर्मा हा ३ वर्षांपूर्वी निर्मला देवी यांच्या घरात भाडेकरू म्हणून आला होता. अवघ्या काही महिन्यांतच घरमालकाची पत्नी रंजना आणि राजन यांच्यात प्रेमसंबंध निर्माण झाले. या अवैध संबंधांची कुणकुण पती त्रिदेश आणि सासू निर्मला देवी यांना लागली होती, ज्यामुळे घरात रोज भांडणे होत असत. निर्मला देवी आपल्या मुलाची बाजू घेत असल्याने रंजनाला त्या खटकू लागल्या होत्या. ३ दिवसांपूर्वी सासूने स्वतःचे जेवण वेगळे बनवण्यास सुरुवात केली, तेव्हाच रंजना आणि राजनने त्यांना कायमचे संपवण्याचा निर्णय घेतला.

हात-पाय बांधून साडीने आवळला गळा

२१ मार्च रोजी जेव्हा पती त्रिदेश वीज विभागाच्या ड्युटीवर गेले होते आणि नातू डिलिव्हरी बॉयच्या कामासाठी बाहेर होता, तेव्हा रंजनाने प्रियकर राजनला बोलावून घेतले. दोघांनी मिळून निर्मला देवी यांचे हात-पाय बांधले आणि साडीने गळा आवळून त्यांची हत्या केली. हत्येनंतर पोलिसांनी याला लूटमार समजावे, या उद्देशाने रंजनाने सासूच्या अंगावरील सर्व दागिने काढून लपवून ठेवले.

सीसीटीव्ही आणि डॉग स्क्वाडने उघडले गुपित

कातिल सून किती चलाख होती, याचा अंदाज यावरून येतो की दुपारी २ ते ४ या वेळेत घरातील सीसीटीव्ही कॅमेरे मुद्दाम बंद करण्यात आले होते. नातू घरी आल्यावर जेव्हा त्याने आजीचा मृतदेह पाहिला, तेव्हा रंजना बाहेरून काहीच माहित नसल्याचे नाटक करत प्रियकरासोबत घरी पोहोचली आणि रडू लागली.

मात्र, पोलिसांच्या 'स्निफर डॉग'ने सर्व डाव उलटवला. श्वान वास घेत थेट गर्दीत उभा असलेल्या प्रियकर राजनजवळ जाऊन थांबला. पोलिसांनी जेव्हा ४ नंतरचे फुटेज तपासले, तेव्हा सून आणि प्रियकर एकत्र घराबाहेर पडताना दिसले, ज्यामुळे पोलिसांचा संशय खात्रीत बदलला. पोलिसांनी हत्येसाठी वापरलेली साडी आणि लपवलेले दागिने जप्त केले आहेत. निर्मला देवी यांच्या पार्थिवावर भैंसाकुंड येथे अंत्यसंस्कार करण्यात आले.