हाथरस पुन्हा हादरले! 6 वर्षांच्या चिमुकलीवर बलात्कार, उपचारादरम्यान मुलीचा मृत्यू
By सायली शिर्के | Published: October 6, 2020 12:59 PM2020-10-06T12:59:33+5:302020-10-06T13:12:54+5:30
Hathras Crime News : अवघ्या 6 वर्षांच्या चिमुकलीवर बलात्कार झाल्याची भयंकर घटना समोर आली आहे.
हाथरस पुन्हा हादरले! 6 वर्षांच्या चिमुकलीवर बलात्कार, उपचारादरम्यान मुलीचा मृत्यू
नवी दिल्ली - हाथरसमध्ये तरुणीवर झालेल्या सामूहिक बलात्कार प्रकरणामुळे संपूर्ण देशात संतापाची लाट उसळली आहे. आरोपींना कठोरातील कठोर शिक्षा देण्याची मागणी करण्यात येत आहे. मात्र याच दरम्यान आता हाथरस पुन्हा एकदा हादरले आहे. अवघ्या 6 वर्षांच्या चिमुकलीवर बलात्कार झाल्याची भयंकर घटना समोर आली आहे. उपचारादरम्यान मुलीचा मृत्यू झाला आहे. अलीगड जिल्ह्यातील इगलास गावात ही धक्कादायक घटना घडली आहे.
मिळालेल्या माहितीनुसार, चिमुकलीवर 15 दिवसांपूर्वी बलात्कार करण्यात आला होता. प्रकृती गंभीर असल्याने मुलीवर दिल्लीतील रुग्णालयात उपचार सुरू होते. मात्र उपचारानंतर मुलीचा मृत्यू झाला आहे. यामुळे पुन्हा एकदा परिसरात संतापाची लाट उसळली आहे. मुलीचा मृतदेह दिल्लीहून राहत्या घरी आणत असताना पीडितेच्या कुटुंबियांनी रस्ता रोखला. तसेच आरोपीला शिक्षा मिळाल्यानंतरच मुलीवर अंत्यसंस्कार केले जातील असं पीडित मुलीच्या कुटुंबीयांनी म्हटलं आहे.
14 वर्षाखालील मुलीवर लैंगिक अत्याचार केल्यास दोषीला फाशीची शिक्षाhttps://t.co/yIuVvdLmLb#Rape#Crime
— Lokmat (@MiLOKMAT) September 19, 2020
मावस भावानेच केला बलात्कार
गावात काही काळ तणाव निर्माण झाला असून पोलिसांचा मोठा बंदोबस्त तैनात करण्यात आला आहे. पोलिसांनी याप्रकरणी एका आरोपीला अटक केली आहे. मात्र दोषी आरोपीला पकडलं नसल्याचं कुटुंबीयांनी म्हटलं आहे. मुलीच्या वडिलांनी दिलेल्या माहितीनुसार, मुलीच्या आईचं निधन झालं आहे. त्यामुळे सहा वर्षांची चिमुकली काही दिवसांसाठी आपल्या मावशीच्या घरी राहायला गेली होती. त्याच वेळी मावस भावाने तिच्यावर बलात्कार केला.
"जोपर्यंत आम्हाला न्याय मिळत नाही तोपर्यंत मुलीच्या मृतदेहावर अंत्यसंस्कार करणार नाही"
पीडित मुलीच्या कुटुंबीयांनी पोलिसांनी योग्य प्रकारे कारवाई केली नसल्याचा आरोप केला आहे. वडिलांनी माझ्या मुलीला परत आणा आणि या प्रकरणात दोषी असलेल्या आरोपीला अटक करा असं देखील म्हटलं आहे. तसेच इगलासच्या एसओना सस्पेंड करण्याची मागणी देखील त्यांनी केली आहे. जोपर्यंत आम्हाला न्याय मिळत नाही तोपर्यंत मुलीच्या मृतदेहावर अंत्यसंस्कार करणार नसल्याचं कुटुंबीयांनी म्हटलं आहे. एका हिंदी वेबसाईटने याबाबतचे वृत्त दिले आहे.
वयाच्या 18 व्या वर्षी मुलालाही काढलं जातं गावाबाहेरhttps://t.co/5l7LvtaMUD#women
— Lokmat (@MiLOKMAT) October 5, 2020
