ज्योतिष्याची 'ती' भविष्यवाणी खरी ठरली; राजा-सोनम लग्नाआधी अन् नंतर काय घडले?

राजा रघुवंशी हत्या प्रकरणानंतर ज्योतिषाने केलेली २ भविष्यवाणी चर्चेत आहे जी आता खरी होताना दिसते.

इंदूर - राजा रघुवंशीने जर पंडिताचे ऐकले असते आणि शुभ मुहूर्तावर हनीमूनला गेला असता तर कदाचित तो आज जिवंत असता अशी चर्चा लोकांमध्ये आहे. सोनमच्या विदाईसाठी पंडितने ५ जूनची तारीख दिली होती. परंतु त्याआधीच ते हनीमूनला निघून गेले. राजाचा प्लॅन आसाम येथे जात कामाख्या देवीचे दर्शन करण्याचा होता परंतु सोनम रघुवंशीने मेघालयचा प्लॅन बनवला आणि दोघेही शिलांगला पोहचले.

राजा रघुवंशी हत्या प्रकरणानंतर ज्योतिषाने केलेली २ भविष्यवाणी चर्चेत आहे जी आता खरी होताना दिसते. लग्नानंतर दीड महिने घर सोडू नका असा सल्ला ज्योतिषाने दिल्याचा खुलासा सोनम रघुवंशीच्या वडिलांनी केला. सोनमच्या विदाईसाठी ५ जून तारीख दिली होती तोपर्यंत तिला माहेरीच राहायचे होते. २१ मे रोजी कामाख्या देवीचे दर्शन करण्यासाठी ते आसामला गेल्याचे वडिलांनी सांगितले. ज्योतिषाने २ भविष्यवाणी केली होती, ज्यात हनीमूनला धोक्याची शक्यता आणि मुलीच्या परतण्यासाठी जादूटोण्याचा वापर यांचा समावेश होता.

मेट्रोमोनियल साईटवरून जुळलं नाते

सोनमने मेट्रोमोनियल साईटवरून राजाला शोधले. ज्योतिषी एनके पांडे यांनी सोनम आणि राजाची कुंडली पाहिली. दोघेही मांगलिक होते. आधी लग्नाची तारीख १६ मे काढण्यात आली. या दोघांना दिवाळीनंतर लग्न करायचे होते परंतु राजाच्या वडिलांनी इतके दिवस थांबण्यास नकार देत ११ मे रोजी लग्न करण्याचं ठरवले. त्यानंतर ज्योतिषाने ३१ मे पर्यंत सोनमची विदाई करू नका असं सांगितले. ३१ मे रोजी दुपारी अथवा संध्याकाळी तिची पाठवणी करण्याची वेळ सांगितली. तोपर्यंत सोनमला तिच्या माहेरीच राहायचा सल्ला दिला परंतु लग्नाच्या तिसऱ्याच दिवशी सोनमची पाठवणी करण्यात आली. 

ज्योतिषाचे न ऐकल्यानं हे घडलं...सोनमचे वडील बोलले

ज्योतिषाचे न ऐकल्याने हे सर्व घडले असं सोनमच्या वडिलांनी सांगत राजा रघुवंशीच्या हत्येत सोनमचा हात असल्याचा आरोप फेटाळला. त्यांनी मेघालय पोलीस खोटे बोलत असल्याचे देवी सिंह म्हणाले. मेघालय पोलिसांनी राजाच्या हत्येत प्रेमाचा त्रिकोण असल्याची शक्यता वर्तवत राज कुशवाह यालाही अटक केली आहे. राज कुशवाहसोबत सोनमचं अफेअर असल्याचे बोलले जाते. राज या संपूर्ण घटनेचा मास्टरमाईंड असून तो सोनमच्या वडिलांच्या प्लायवूड फॅक्टरीत काम करत होता. तिथे मॅनेजर असताना राज आणि सोनमची ओळख झाली होती.

उलटा फोटो टांगल्यानंतर सोनम परतली

राजा रघुवंशीचा मृतदेह २ जूनला मिळाल्यानंतर सोनम बेपत्ता होती. तेव्हा तिचे वडील देवी सिंह यांनी पुन्हा ज्योतिषाचा दरवाजा ठोठावला. तेव्हा ज्योतिषाने उपाय म्हणून घराबाहेर सोनमचा उलटा फोटो लटकवण्याचा सल्ला दिला मग ती घरी येईल असं सांगितले. ज्योतिषाच्या सांगण्याप्रमाणे देवी सिंह यांनी घराबाहेर उलटा फोटो लटकवला आणि २ दिवसांनीच सोनम परतली आहे.