नवी दिल्ली - देशात अनेक धक्कादायक घटना घडत आहेत. अशीच एक भयंकर घटना आता पुन्हा एकदा समोर आली आहे. जीन्स घालते म्हणून एका तरुणीची तिच्या काकांनी आणि आजोबांनी हत्या केल्याची संतापजनक घटना समोर आली आहे. उत्तर प्रदेशच्या देवरियामध्ये नात्याला काळीमा फासणारी ही घटना घडली आहे. 17 वर्षीय तरुणीला तिच्या काकांनी आणि आजोबांनी जीन्स घालून नको असं वारंवार सांगितलं होतं. मात्र तिने त्याची ही गोष्ट ऐकण्यास नकार दिला. त्यामुळे संतापलेल्या या दोघांनी टोकाचं पाऊल उचलत तिची हत्या केली आहे.
मिळालेल्या माहितीनुसार, मुलीचे वडील लुधियानात नोकरी करत असल्यामुळे ही मुलगी आपल्या आईवडिलांसोबत शहरात राहत होती. मात्र सध्या कोरोनाकाळात हे कुटुंब गावी आलं होतं. शहराप्रमाणे गावात जीन्स घालून फिरण्याला मुलीच्या काकाचा विरोध होता. यावरून त्या मुलीमध्ये आणि काकामध्ये अऩेकदा वादही होत असे. हाच राग मनात ठेऊन काकाने आणि मुलीच्या आजोबांनी तिला बेदम मारहाण केली. दोघांनी केलेल्या मारहाणीदरम्यान भिंतीवर डोकं आपटून या मुलीचा मृत्यू झाला.
आपला गुन्हा लपवण्यासाठी या दोघांनी तो मृतदेह गावाबाहेर नेऊन नदीत फेकून देण्याचा प्रयत्न केला. मात्र मृतदेह खाली फेकत असताना मुलीचा पाय रेलिंगमध्ये अडकला आणि मृतदेह नदीच्या पुलावर लटकू लागला. त्यानंतर आपला गुन्हा उघडकीला येईल, या भीतीने दोघांनी तिथून पळ काढला. आईने दिलेल्या तक्रारीवरून पोलीस या मुलीचा शोध घेत होते. पोलिसांना हा मृतदेह नदीच्या पुलावर लटकत असल्याचे आढळून आले आणि हत्येचा हा धक्कादायक प्रकार उघड झाला. पोलीस या प्रकरणाचा अधिक तपास करत आहेत. एका हिंदी वेबसाईटने याबाबतचे वृत्त दिले आहे.
नात्याला काळीमा! मुलगाच झाला वैरी, विजेचा शॉक देऊन वडिलांची हत्या, गुपचूप केले अंत्यसंस्कार अन्...
नात्याला काळीमा फासणारी अशीच एक घटना आता समोर आली आहे. मुलानेच आपल्या जन्मदात्या बापाची हत्या केल्याची धक्कादायक घटना घडली आहे. पंजाबच्या गुरुदारपूरमध्ये एका मुलाने आपल्या वडिलांची अत्यंत निर्घृणपणे हत्या केली आहे. संतापजनक बाब म्हणजे मुलाने विजेचा शॉक देऊन वडिलांना संपवलं आणि कोणाला काही संशय येऊ नये म्हणून वडिलांवर एकट्यानेच अंत्यसंस्कार करून टाकले. पोलीस या प्रकरणाचा अधिक तपास करत आहेत. पोलिसांनी वडिलांच्या हत्येप्रकरणी मुलाला अटक केली आहे. हरपाल सिंह असं आरोपीचं नाव असून त्याने वडील तरसेम सिंह यांना रात्री ट्रॉलीमध्ये घेऊन अंत्यसंस्कार केले आणि राखही विसर्जित केली. पोलिसांनी तरसेम यांचा मोठा मुलगा रछपाल सिंह याने दिलेल्या माहितीच्या आधारे कारवाई करून आरोपीला अटक केली आहे.