जि़प़चे समाजकल्याण कार्यालय तळमजल्यावर येईना़़़

 नांदेड:जिल्हा परिषदेचे समाजकल्याण कार्यालय तळमजल्यावर आणण्याचा समाजकल्याण समितीत ठराव झाल्यानंतरही हे कार्यालय तळमजल्यावर आणण्यास विलंब होत असल्याने अपंगांची हेळसांड सुरूच आहे़ मंगळवारी झालेल्या समाजकल्याण समितीच्या बैठकीत समिती सदस्या वर्षा भोसीकर यांनी या विषयावर पुन्हा एकदा प्रशासनास धारेवर धरले़ जिल्हा परिषदेची लिफ्ट दोन वर्षापासून बंद आहे़ ही लिफ्ट सुरू करण्यात येत असली तरी समाजकल्याण कार्यालय तळमजल्यावर आणण्याचा ठरावाची अंमलबजावणी का झाली नाही असा प्रश्न वर्षाताई भोसीकर यांनी मांडला़ मात्र या प्रश्नावर खुद्द समाजकल्याण समिती सभापती मंगाराणी अंबुलगेकर याही गंभीर नसल्याने प्रशासनाकडूनही चालढकलच केली जात आहे़ तळमजल्यावर कार्यालयासाठी जागा नसल्याचे कारण प्रशासन देत आहे तर समिती सभापतींसाठी तळमजल्यावर कक्ष कसा करता येईल हा प्रश्नही पुढे आला आहे़ त्यामुळे अपंगांच्या प्रश्नावर जिल्हा परिषद समाजकल्याण विभाग आणि समाजकल्याण समिती किती गंभीर आहे हेच दिसून येत आहे़ मंगळवारी झालेल्या बैठकीच्या प्रारंभीच २४ एप्रिल रोजी आयोजित बैठक रद्द का केली याबाबतही सौ़ भोसीकर यांनी प्रश्न उपस्थित केला़ ही बैठक रद्द अथवा पुढे ढकलली याबाबत प्रशासनाकडून कोणतीही माहिती सदस्यांना का दिली नाही याबाबत खुलासा करण्याची मागणी करण्यात आली़ खुलासा येईपर्यंत बैठक पुढे चालू देणार नाही अशी आक्रमक भूमिका वर्षा भोसीकर यांनी घेतली़ यावेळी समाजकल्याण समिती सभापती मंगाराणी अंबुलगेकर यांनी मध्यस्थी करीत बैठकीस सुरूवात केली़ (प्रतिनिधी)