कुलगुरूंनी पकडली ‘सामूहिक कॉपी’; विद्यार्थ्यांचा संपूर्ण परफॉर्मन्स रद्द करण्याचे आदेश

या सर्व विद्यार्थ्यांचा ‘संपूर्ण परफॉर्मन्स’ रद्द करण्याचे आदेश कुलगुरूंनी दिल्याची माहिती प्रशासनाने दिली.

छत्रपती संभाजीनगर : डॉ. बाबासाहेब आंबेडकर मराठवाडा विद्यापीठाचे कुलगुरू डॉ. विजय फुलारी हे मागील काही दिवसांपासून परीक्षा केंद्रांना अचानक भेटी देऊन कारवाई करीत आहेत. पदव्युत्तर व व्यावसायिक अभ्यासक्रमाच्या तब्बल नऊ परीक्षा केंद्रांना कुलगुरूंच्या पथकाने भेट दिली. त्यात पाथरी येथील राजर्षी शाहू महाविद्यालयाच्या दोन हॉलमध्ये 'मास कॉपी' आढळून आली. या सर्व विद्यार्थ्यांचा ‘संपूर्ण परफॉर्मन्स’ रद्द करण्याचे आदेश कुलगुरूंनी दिल्याची माहिती प्रशासनाने दिली.

विद्यापीठाच्या पदव्युत्तर अभ्यासक्रमांची परीक्षा २९ एप्रिल तर ६ मे पासून व्यावसायिक अभ्यासक्रमांच्या परीक्षा सुरू आहेत. कुलगुरू डॉ. फुलारी यांनी पदव्युत्तर परीक्षेत २९ एप्रिल रोजी पहिल्याच दिवशी बीड शहरातील तीन परीक्षा केंद्रांना अचानक भेट दिली. या ठिकाणी ३६ कॉपीबहादर आढळले असून त्यांचा ‘संपूर्ण परफॉर्मन्स रद्द’ (डब्ल्यूपीसी) करण्याचे आदेश दिले. त्यानंतरही परीक्षा केंद्रावर कुलगुरूंच्या अकस्मात भेटी देण्याचा धडाकाच सुरू आहे. चार जिल्ह्यांत ३२ परीक्षा केंद्रे आहेत. त्यासाठी ३२ भरारी पथके स्थापन केली आहेत. पदव्युत्तर परीक्षा सुरू झाल्यावर तिन्ही आठवड्यांत सुमारे ५० परीक्षा केंद्रांना कुलगुरूंनी भेट दिली. शुक्रवारी शहरातील व्ही. एन. पाटील, एम. पी. लॉ कॉलेज, डॉ. बाबासाहेब आंबेडकर विधी महाविद्यालय, राजेश टोपे फार्मसी, शासकीय औषधनिर्माणशास्त्र महाविद्यालय, वाय. बी. चव्हाण फार्मसी महाविद्यालय अशा सात ठिकाणी भेट दिली. याठिकाणी १२ कॉपीबहाद्दर सापडले. सकाळच्या सत्रात फुलंब्री तालुक्यातील पाथरी येथील राजर्षी शाहू महाविद्यालयाच्या दोन हॉलमध्ये 'मास कॉपी' आढळून आल्याने येथील सर्व विद्यार्थ्यांचा संपूर्ण परफॉर्मन्स रद्द करण्याचे आदेशही कुलगुरूंनी परीक्षा संचालक डॉ. बी. एन. डोळे यांना दिले आहेत. या ठिकाणी दोन पोती नकला सापडल्या. खामगाव येथील गोरक्ष फार्मसी महाविद्यालयात ५ कॉपी बहाद्दरांना पकडले. त्यांचाही संपूर्ण परफॉर्मन्स रद्द होणार आहे. कुलगुरूंसोबत भरारी पथकात डॉ. सतीश दांडगे व डॉ. सचिन भुसारी होते.

पर्यवेक्षक, केंद्रप्रमुखांची खरडपट्टी
पदव्युत्तर अभ्यासक्रमांच्या काही परीक्षा केंद्रांवर विद्यापीठाच्या नियमाप्रमाणे बैठक व्यवस्था नव्हती. याविषयी कुलगुरू डॉ. फुलारी यांनी संबंधित केंद्रप्रमुखाला विचारणा केली. तसेच पर्यवेक्षकांची खरडपट्टी काढली. या संदर्भात परीक्षा संचालक डॉ. डोळे यांना नियमाप्रमाणे कारवाईच्या सूचना कुलगुरूंनी केल्या आहेत.