अनधिकृत होर्डिंग्ज हटवले

नांदेड : शहरातील विविध भागात विनापरवाना आणि अनधिकृतपणे लावण्यात आलेले १८ होर्डिंग्ज सोमवारी मनपा क्षेत्रीय अधिकाऱ्यांच्या पथकाने काढून टाकले़ शिवाजीनगर येथील काही लोकांनी होर्डिंग्ज काढण्यास आक्षेप घेण्याचा प्रयत्न केला, परंतु उच्च न्यायालयाच्या निर्देशानुसार ही कारवाई केली जात असल्याचे सांगितल्यानंतर लोक शांत झाले़ महापालिकेच्या सर्व क्षेत्रीय कार्यालयाने आज अचानकपणे ही मोहीम राबविली़ मुंबई उच्च न्यायालयाने २१ फेब्रुवारी २०१४ रोजी दिलेल्या निर्देशानुसार विनापरवानगी व अनधिकृतपणे असलेले होर्डिंग्ज काढून घेण्याची कारवाई यापूर्वी देखील करण्यात आली असून काही प्रकरणात गुन्हेही नोंदवण्यात आले आहेत़ शहराचे सौंदर्य अबाधित ठेवून बेकायदेशीर होर्डिंग्जवर प्रतिबंध करण्याचे आदेश यापूर्वीच निर्गमित करण्यात आले आहेत़त्यानुसार प्रभारी आयुक्त डॉ़ निशिकांत देशपांडे यांनी केलेल्या सूचनेनुसार उपायुक्त रत्नाकर वाघमारे व राजेंद्र खंदारे यांच्या मार्गदर्शनाखाली अनधिकृत बांधकाम विभागाचे सहायक आयुक्त अविनाश अटकोरे, शिवाजी डहाळे, गणेशराव आडेराघो, सुधीर इंगोले, एस़ टी़ मोरे, मोहन डिंकाळे, गणेश शिंगे, सहायक पोलिस निरीक्षक भराडे यांच्यासह महापालिकेच्या सर्व क्षेत्रीय कार्यालयातील कर निरीक्षक व पोलिस पथकाने शहरातील प्रमुख रस्त्यांवर तसेच सार्वजनिक मालमत्तेवर लावलेले १८ होर्डिंग्ज काढून टाकले़ यामध्ये शिवाजीनगर झोन मधील ४, अशोकनगर ५ , इतवारा ३ , वजिराबाद ४ व तरोडा येथील २ होर्डिंग्जचा समावेश आहे़ (प्रतिनिधी)परवानगीशिवाय होर्डिंग्ज नको शहरात होर्डिंग्ज लावायचे आहेत, त्यांनी महापालिकेची रितसर परवानगी घेऊन दिलेल्या मुदतीतच होर्डिंग्ज लावावे़ जाहिरातीसाठी महापालिकेने काही कायम स्थळे निश्चित करून अभिकर्त्यांची नेमणूक केली आहे़ त्यांच्याकडून परवानगी घेऊनच आपले होर्डिंग्ज लावावेत़ वाहतूक व रहदारीला अडथळा होणार नाही, अशा खाजगी जागेवर होर्डिंग्जला शक्य तितक्या लवकर तात्पुरती परवानगी देण्यात येईल़ परंतु परवानगी असल्याशिवाय कोणीही दृष्टीगोचर होर्डिंग्ज लावून सार्वजनिक मालमत्ता विरूपण कायद्याचा भंग करू नये तसेच न्यायालयाच्या निर्णयाचा आदर करावा, असे आवाहन प्रभारी आयुक्त डॉ़ निशिकांत देशपांडे यांनी केले आहे़