नामांकित कंपनीच्या बियाणांसाठी धडपड

पालम : तालुक्यातील शेतकर्‍यांनी पेरणीपूर्व मशागतीची कामे आटोपली आहेत़ पेरणीच्या तोंडावर नामांकित बियाणांची खरेदी सुरू झालेली आहे़ शेतात पेरण्यासाठी नामांकीत बियाणे मिळावे, यासाठी शेतकर्‍यांनी धडपड सुरू केली आहे़ मे महिन्याच्या शेवटी शेतकर्‍यांनी शेतातील नांगरट, पाळी यासह विविध कामे आटोपली आहेत़ बागायतदार शेतकरी मे महिन्याच्या शेवटी कापसाची लागवड करीत असतात़ यासाठी चांगल्या कंपनीची उत्पादन देणारे बियाणे निवडले जातात़ कापूस लागवडीसाठी शेतकर्‍यांनी कापसाच्या बियाणांच्या खरेदीवर उडी मारलेली आहे़ बाजारपेठेत विविध कंपन्यांच्या बियाणांची दुकानदारांकडे विचारणा केली जात आहे़ नामांकित कंपन्यांचे बियाणे मिळावे, यासाठी शेतकरी आग्रह धरीत आहेत़ त्यामुळे बियाणांची टंचाई निर्माण झाल्याने भाव वधारले आहेत़ सोयाबीन बियाणाची टंचाई निर्माण होण्याची भीती निर्माण झाल्याने आतापासून सोयाबीन बियाणाची खरेदी करण्यावर भर दिला जात आहे़ पुढील काळात बियाणे, रासायनिक खतांची टंचाई निर्माण होण्याच्या भीतीने शेतकर्‍यांनी आतापासून बियाणे खरेदीची लगबग सुरू केली आहे़ नामांकित कंपनीचे बियाणे मिळावेत यासाठी बाजारपेठेत शोध घेतला जात आहे़ पालम शहरात बियाणे न मिळाल्यास गंगाखेड, परभणी, लोहा, नांदेड या ठिकाणी शेतकरी बियाणांची खरेदी करीत आहेत़ (प्रतिनिधी)पेरणीसाठी शेतकरी बियाणे खरेदीत व्यस्त आहेत़ नामांकीत कंपनीच्या बियाणांची खरेदी करताना बाजारपेठेत फिरून किमतीची चौकशी केली जात आहे़ ज्या दुकानावर बियाणांची किंमत कमी असेल अशा दुकानावरून शेतकरी बियाणांची खरेदी करीत आहेत़ बियाणांच्या किमतीची चौकशी करूनही खरेदी करण्यावर शेतकर्‍यांनी भर दिला आहे़ पेरणीच्या तोंडावर शेतकर्‍यांनी बियाणांची खरेदी सुरू केली आहे़ यावर ते शेतकर्‍यांना बियाणे उपलब्ध करून देण्यासाठी कृषी विभाग प्रयत्न करीत आहे़ नामांकित कंपनीच्या प्रमुखांना भेटून बियाणे शक्य तेवढे जास्त उपलब्ध करून देण्यात येत आहे़ शेतकर्‍यांना बियाणे विक्री करताना काळा बाजार करण्याचा प्रयत्न केल्यास दुकानदारांवर कारवाई करण्यात येईल, असा इशारा जि़प़ सभापती गणेशराव रोकडे यांनी दिला़