नगरपंचायतसाठी ग्रा.पं.चा सहमतीचा ठराव

सेनगाव : येथील ग्रामपंचायतीचे रूपांतर नगरपंचायतमध्ये होणार असून, त्याकरिता शासनाने हरकती मागविल्या आहेत. त्या अनुषंगाने शुक्रवारी सेनगाव ग्रामपंचायतीने मासिक बैठक घेऊन नगरपंचायत करण्याचा सहमतीचा ठराव सर्वानुमते घेतला. राज्य शासनाच्या निर्णयानुसार लवकरच सेनगाव येथे ग्रामपंचायत बरखास्त होवून नगरपंचायत अस्तित्वात येणार आहे. त्याकरीता शासन स्तरावर नगरविकास मंत्रालय कामाला लागले असून, अधिसूचना जारी करण्यात आली आहे. नगर- पंचायत करीता शासनाने संबंधित ग्रामपंचायत, जिल्हा परिषद यांच्या हरकती मागविल्या असून, त्या अनुषंगाने सेनगाव ग्रामपंचायतीची आज विशेष मासिक बैठक बोलाविण्यात आली होती. त्यात सर्वानुमते सेनगाव ग्रामपंचायतीचे रूपांतर नगरपंचायतीमध्ये करण्याचा ठराव घेण्यात आला. यासाठी २४ मे रोजी विशेष ग्रामसभा घेण्यात येणार आहे. शुक्रवारी झालेल्या ग्रा.पं. मासिक बैठकीला सरपंच संजय वाघमारे, उपसरपंच गणेश जारे, सदस्य जगन्नाथ देशमुख, गजानन उफाड, कमलाबाई खताळ, मथुराबाई हनवते, जगदेवराव देशमुख, देवानंद दिनकर, ग्रामविकास अधिकारी राजेंद्र गोर्डे उपस्थित होते. सेनगाव ग्रामसभेच्या निर्णयानंतर जिल्हा परिषद स्थायी समितीचा ठराव घेण्यात येणार असून, त्यानंतर शासन स्तरावर नगर पंचायत कार्यान्वित करण्याची प्रक्रिया होणार आहे. (वार्ताहर)