आयुक्तांना हात जोडून विनंती, छत्रपती संभाजीनगरातील अनधिकृत बॅनर काढा : महापौर समीर राजूरकर

आता तुला 'जीबी'मध्ये पाहून घेतो, अशा धमक्या सुरू झाल्यात - आयुक्त जी. श्रीकांत

छत्रपती संभाजीनगर : अनधिकृत बॅनरबाजीमुळे क्रांतीचौकासह संपूर्ण शहर विद्रूप झाले आहे. माझी मनपा आयुक्तांना हात जोडून विनंती आहे, हे सर्व बॅनर काढा. बॅनरमुक्त शहर तयार करून आपण एक आदर्श निर्माण करू, अशी आर्त हाक नवनियुक्त महापौर समीर राजुरकर यांनी मनपा, पोलिस प्रशासनाला दिली. त्याच्या प्रत्युत्तरात मात्र मनपा आयुक्त जी. श्रीकांत यांनी 'माझे अधिकारी, कर्मचारी बॅनर काढायला गेल्यावर कोणा कोणाचे काॅल येतात, हे येथे सांगू शकत नाही. आता तर 'तुला जीबीमध्ये पाहून घेतो, अशा धमक्याही यायल्या लागल्यात' असे सांगत खुद्द आयुक्तांनीच अनधिकृत बॅनरबाजीबाबत अप्रत्यक्ष हतबलता व्यक्त केली.

सर्वत्र १९ फेब्रुवारीला छत्रपती शिवाजी महाराज यांची जयंती साजरी होत आहे. जयंतीनिमित्त शहरात मोठ्या उत्साहात सामाजिक, सांस्कृतिक कार्यक्रम होणार आहे. त्या पार्श्वभूमीवर शहर पोलिसांनी सोमवारी तापडिया नाट्यगृहात समन्वय बैठकीचे आयोजन केले होते. या बैठकीत नागरिकांनी शहरातील नशेखोरी, अस्वच्छ रस्ते, कचरा, उत्सव मिरवणूक मार्गावर वाहणाऱ्या खराब पाण्यावरून प्रशासनावर नाराजी व्यक्त केली.

महापौर समीर राजुरकर, पोलिस आयुक्त प्रवीण पवार, मनपा आयुक्त जी. श्रीकांत, पृथ्वीराज पवार, भाजप शहराध्यक्ष किशोर शितोळे, नगरसेवक अनिल मकरिये, बबन डिडोरे पाटील, पोलिस उपायुक्त प्रशांत स्वामी, रत्नाकर नवले, तहसीलदार उमेश पाटील, ज्योतिराम पाटील यांची उपस्थिती होती.

दिसला खांब की लाव बॅनर, ही वृत्ती बळावलीव्यस्त वेळापत्रकामुळे काही वेळेसाठीच आलेल्या महापौर समीर राजुरकर यांनी पाच मिनिटांच्या भाषणात आदर्श शिवजयंती साजरी करण्याचे आवाहन केले. यापुढे अनाठायी खर्च करण्याऐवजी महाराजांचे अर्थशास्त्र, युद्धनीती, राजनीती, शेतीविषयी धोरणांबाबत तज्ज्ञांचे व्याख्यानसत्र ठेवावे. यामुळे नव्या पिढीसमोर आदर्श उभा राहील, असे आवाहन केले. यावेळी त्यांनी शहरातील अनधिकृत बॅनरबाजीबाबत खंत व्यक्त केली. क्रांती चौकासह ठिकठिकाणी बॅनरबाजी केली जाते. एक शिवप्रेमी म्हणून मी मनपा आयुक्तांना हे बॅनर काढण्यासाठी विनंती करतो, अशी हाक त्यांनी दिली. त्याला उत्तर देताना जी. श्रीकांत म्हणाले की, मी अनधिकृत बॅनरवर कारवाई कधीही करू शकतो. मात्र, शहरात खांब दिसला की लाव बॅनर ही वृत्ती वाढली आहे. कार्यकर्ते, पदाधिकाऱ्यांनी एकही खांब रिकामा सोडला नाही. त्यावर कारवाई करायला गेले की कोणा कोणाचे काॅल येतात, हे येथे सांगू शकत नाही. आता तर तुला जीबीमध्ये पाहून घेतो, अशा धमक्याही यायल्या लागल्यात' असा खुलासाही त्यांनी केला.

मी आयएएस तरीही मुलींना क्रांती चौकात नेण्याची हिंमत झाली नाहीक्रांती चौकातील मिरवणूक उत्सव व गर्दीवरूनही अनेकांनी सूचना केल्या. क्रांती चौकातील शिवजन्मोत्सव पाहायला कुटुंब एकत्र येते. त्यामुळे क्रांती चौकात महिला, तरुणींसाठी बॅरिकेटिंग करून स्वतंत्र भाग तयार करण्याची मागणी बैठकीला महिलांनी केली. तर जी. श्रीकांत यांनी क्रांती चौकात डीजेमुक्त जयंती साजरी करण्याचे आवाहन करताना स्वानुभव सांगितला. डीजे लावला की काही हुल्लडबाज तरुण मिरवणुकीत सहभागी होतात. गतवर्षी मी माझ्या एका मुलीला माँ जिजाऊ, तर दुसऱ्या मुलीला शिवाजी महाराजांची वेशभूषा केली हाेती. त्यांना क्रांती चौकात जायचे होते. मात्र, आयएएस असूनही क्रांती चौकातील गदारोळामुळे माझ्या मुलींना घेऊन जाण्याची हिंमत झाली नाही. यंदाची शिवजयंती उत्साहात मात्र डीजेमुक्त, कुटुंबांना सहभागी होता येईल, अशी सुरक्षित साजरी करा, स्वयंसेवकांनी त्यासाठी पुढे यावे, असे आवाहन त्यांनी यावेळी केले.

शहर खड्डेमुक्त केल्याचा आयुक्तांचा दावाबैठकीत एकही प्रश्न खड्ड्यांबाबत आला नाही, याबाबत जी. श्रीकांत यांनी समाधान व्यक्त करत शहर खड्डेमुक्त केल्याचा दावा केला. मनपाने तासाभरात खड्डे बुजवण्याचे मशीन आणले आहे. शिवजयंती मिरवणूक मार्गावरील प्रत्येक खड्डा बुजवला जाईल. जो रस्ता अन्य विभागांकडे आहे, तेही खड्डे बुजवा, अशी सूचना श्रीकांत यांनी बैठकीतच शहर अभियंत्यांना केली.