सार्वजनिक बांधकाम खात्याला आली जाग; अजिंठा लेणी रस्त्यासाठी ३१ जुलै डेडलाइन!

लोकमत इम्पॅक्ट: जागतिक वारसास्थळाच्या दर्जा लाभलेल्या अजिंठा लेणी पाहण्यासाठी जगभरातून पर्यटक येतात. मात्र, या लेण्यांपर्यंत पोहोचण्यासाठी रस्ताच नसल्याने पर्यटक रोडावले असून, जागतिक पातळीवर महाराष्ट्राची नामुष्की होत आहे.

- विकास राऊत

छत्रपती संभाजीनगर : जगप्रसिद्ध अजिंठा लेणीकडे जाणाऱ्या रस्त्याच्या दुरवस्थेबाबत ‘लोकमत’मध्ये वृत्त प्रसिद्ध होताच सार्वजनिक बांधकाम खाते खडबडून जागे झाले असून, ३१ जुलैपर्यंत काम पू्र्ण करण्याची डेडलाइन ठरविली आहे. ‘लोकमत’च्या वृत्तानंतर सार्वजनिक बांधकाम विभागाच्या वरिष्ठ अधिकाऱ्यांची व्हिडीओ कॉन्फरन्स झाली. त्यामध्ये अजिंठा रोडबाबत चर्चा झाली. छत्रपती संभाजीनगरमधील सार्वजनिक बांधकाम विभागाचे (राष्ट्रीय महामार्ग) कार्यकारी अभियंता एस. एल. गलांडे यांनी याविषयी माहिती दिली.

जागतिक वारसास्थळाच्या दर्जा लाभलेल्या अजिंठा लेणी पाहण्यासाठी जगभरातून पर्यटक येतात. मात्र, या लेण्यांपर्यंत पोहोचण्यासाठी रस्ताच नसल्याने पर्यटक रोडावले असून, जागतिक पातळीवर महाराष्ट्राची नामुष्की होत आहे. छत्रपती संभाजीनगर ते अजिंठा लेण्यांपर्यंतच्या सुमारे ९५ किमी अंतराच्या रस्त्याचे गेल्या दहा वर्षांपासून काम सुरू आहे. अजून २० किमीचे काम अर्धवट आहे. काही कामाची दोनवेळा डागडुजी करावी लागली. २०२० साली या रस्त्याच्या रुंदीकरणासाठी १ हजार कोटीची निविदा काढण्यात आली. सिमेंट काँक्रिटीकरणातून रस्त्याचे काम सुरू झाले. मात्र, सिल्लोड शहरातील ६.२ किमी, निल्लोड ७ किमी, हर्सूल १ किमी, पालोद, अजिंठा पुलाचे काम बाकी आहे. यातील निल्लोड ते सिल्लोडपर्यंतचे काम धुळे सा. बां.कडे आहे. ७ किमीचे ते काम बाकी आहे.

शहरातून जाणाऱ्या रस्त्यांचे काय करणार
अजिंठा लेणीकडे जाणाऱ्या हर्सूल ते फर्दापूर या राष्ट्रीय महामार्ग क्रमांक ७५३ एफच्या चौपदरीकरणादरम्यान असलेल्या हर्सूल गावातील मालमत्तांची पाडापाडी करून रस्ता मोकळा केला. परंतु रस्त्यालगत असलेल्या कब्रस्तानाच्या स्थलांतराचा प्रश्न कायम आहे. रस्त्यासाठी पशुसंवर्धन विभागाकडे जागा मागितली होती. परंतु त्यांनी जागा दिली नाही. मग कब्रस्तानच्या जागेचा पर्याय समोर आला. जागा मिळेपर्यंत सध्या १० मीटर रस्त्याचे काम पूर्ण केले आहे. त्यामुळे वाहतूक खोळंबणार नाही. १० दिवसांत हे काम पूर्ण होईल, असे गलांडे म्हणाले.

पाच वर्षांत ७० किमी काम...
रोज ३ किमी काँक्रीट रस्ते बांधण्याचा दावा करणारी यंत्रणा मागील ५ वर्षांपासून ९५ किमीपैकी ७० किमी रस्ता बांधू शकली आहे. कंत्राटदाराची क्षमता १२० टीपीएच, ३० हजार क्युबिक मीटर दरमहा काँक्रिटीकरणाची असतानादेखील कामाला विलंब झाला. या क्षमतेच्या कंत्राटदाराकडून दरमहा १३ किमी रस्ता बांधणी अपेक्षित असते. लांबी, रुंदी, जागा, वाहतूक याचा विचार होऊन रस्त्याचे काम होते. या क्षमतेचा विचार केला तर साधारणत: तीन महिन्यांत रस्ता व आठ महिन्यांत पुलांचे काम होणे शक्य आहे. वर्षभरात रस्ता पूर्ण होण्याऐवजी पाच वर्षे लागले आहेत.

३१ जुलैपर्यंत रस्त्याचे काम पूर्ण करू
जुलै २०२५ पर्यंत शिल्लक राहिलेले काम पूर्ण करू. त्यासाठी कामाचे टप्पे ठरविले आहेत. भूसंपादनाबाबतही एसडीएमकडे पत्रव्यवहार करून रक्कम जमा केली आहे.
- एस. एल. गलांडे, कार्यकारी अभियंता, सा. बां.