नवरात्रोत्सवाची तयारी पूर्ण

तुळजापूर : शारदीय नवरात्र महोत्सवास गुरुवारी मंदिर संस्थानचे अध्यक्ष तथा जिल्हाधिकारी डॉ. प्रशांत नारनवरे यांच्या हस्ते घटस्थापनेने प्रारंभ होत आहे. मंदिर संस्थान, जिल्हा प्रशासन, पोलिस प्रशासनासह विविध शासकीय यंत्रणांनी भाविकांना सुविधा उपलब्ध करुन देण्याबाबतची जय्यत तयारी केली असून, तुळजापूर वासियांसह प्रशासनही भाविकांच्या स्वागतासाठी सज्ज झाले आहे.
२५ सप्टेंबर रोजी पहाटे श्री देवीजींची सिंहासनावर प्रतिष्ठापना करण्यात येणार असून, दुपारी १२ वाजता घटस्थापना होऊन ब्रह्मवृंदास अनुष्ठानाची वर्णी देण्यात येणार आहे. रात्री छबीना मिरवणूक होणार आहे. २६ व २७ रोजी नित्योपचार पूजा व रात्री छबीना होणार आहे. २८ सप्टेंबर रोजी ललीता पंचमी, नित्योपचार पूजा, रथ अलंकार महापूजा व रात्री छबीना. २९ रोजी नित्योपचार पूजा व मुरली अलंकार महापूजा व रात्री छबीना. ३० रोजी नित्योपचार पूजा शेषशाही अलंकार महापूजा व रात्री छबीना. १ आॅक्टोबर रोजी नित्योपचार पूजा व भवानी तलावार अलंकार महापूजा व रात्री छबीना असे कार्यक्रम होणार आहेत.
२ आॅक्टोबर रोजी दुर्गाष्टमीनिमित्त नित्योपचार महापूजा होऊन महिषासूर मर्दिनी अलंकार महापूजा मांडण्यात येणार आहे. यानंतर सकाळी ७ वाजता वैदिक होमास व हवनास प्रारंभ होऊन दुपारी १२.१० वाजता पूर्णाहुती तर रात्री छबीना मिरवणूक काढण्यात येणार आहे. ३ आॅक्टोबर रोजी महानवमीनिमित्त नित्योपचार पूजा झाल्यानंतर दुपारी १२ वाजता होमावर धार्मिक विधी पार पडणार आहे. यानंतर घटोत्थापना होऊन सायंकाळी सार्वत्रिक सिमोल्लंघन, शमीपूजन व रात्री नगरहून येणारे पलंग पालखीची मिरवणूक काढण्यात येणार आहे. ४ आॅक्टोबर विजयादशमी (दसरा) असून, या दिवशी उष:काली श्रीदेवीजींचे शिबिकारोहन, सीमोल्लंघन मंदिराभावेती मिरवणूक झाल्यानंतर देवीच्या मंचकी निद्रेस प्रारंभ होणार आहे. यानंतर ७ आॅक्टोबर रोजी कोजागिरी पोर्णिमेदिवशी रात्री भवानी मातेची सिंहासनावर प्रतिष्ठापना करण्यात येणार असून, ८ रोजी मंदिर पोर्णिमा नित्योपचार पूजा व रात्री सोलापूरच्या काठ्यासह छबीना मिरवणूक तर ९ आॅक्टोबर रोजी नित्योपचार पूजा, अन्नदान महाप्रसाद व रात्री सोलापूरच्या काठ्यासह छबीना मिरवणूक काढण्यात येणार असल्याचे मंदिर संस्थानचे अध्यक्ष डॉ. नारनवरे यांनी कळविले आहे. (वार्ताहर)
आई राजा उदोऽ उदोऽऽचा जयघोष करीत हलगी, ताशा, ढोल, लेझीम, झांजपथकांच्या गजरात हजारो भाविक बुधवारी भवानी ज्योत घेऊन तुळजापूर शहरात दाखल झाले. भाविकांनी येथील बसस्थानक परिसर, शिवाजी चौक ते महाद्वार चौक, भवानी रोड भाविकांच्या गर्दीने फुलून गेला. भाविकांची वाढती गर्दी लक्षात घेऊन पालिका प्रशासनाने शहरात वाहनधारकांना प्रवेशबंदी केली. सर्व प्रमुख रस्त्यांच्या तोंडावर बॅरिगेटींग बसवून नाकाबंदी करण्यात आली. तसेच महत्वाच्या ठिकाणी कडक सुरक्षा बंदोबस्त करण्यात आला. बुधवारी घटस्थापनेच्या पूर्वसंध्येला राज्याच्या तसेच परराज्यातील हजारो भाविक आपापल्या मंडळासमवेत देवी दर्शनासाठी तसेच भवानी ज्योत प्रज्वलित करण्यासाठीी दाखल झाले. मंडळाच्या नावाचे बॅनर, देवीचा फोटो, टी-शर्ट, कपाळी डोकी पट्टा, सोबत वाद्याचा गजर यासह भाविक तुळजापुरात दाखल होत होते. मंगळवारी रात्रीनंतर बीड, अहमदनगर, जालना, अमरावती, अकोला, जळगाव, औरंगाबाद आदी ठिकाणाहून युवक भाविक भवानी ज्योतीसह तुळजापुरात दाखल झाले. यामुळे बुधवारी पहाटेपासूनच उस्मानाबाद रोडवर दुतर्फा वाहनांच्या रांगा दिसून आल्या. बार्शी, सोलापूर, पुणे, विजापूर या भागातून येणाऱ्या भाविकांमुळे आराधवाडी, घाटशीळ परिसर गर्दीने फुलला होता. दुपारी चार वाजेनंतर भाविकांच्या गर्दीत वाढ होत असल्याचे दिसून आले. वाढत्या गर्दीचा अंदाज घेऊन पोलीसांनी प्रमुख रस्त्यावर खाजगी वाहनांना प्रवेशबंदी केली. नवरात्रोत्सवाच्या पार्श्वभूमीवर शहरातील लहान-मोठ्या हॉटेलमध्ये गर्दी झाली होती. तसेच प्रासादिक दुकानेही भाविकांच्या गर्दीमुळे गजबजली होती. रस्त्याच्या कडेला बांगड्या विकणाऱ्या महिलांकडेही बांगड्या खरेदीसाठी महिला भाविकांची गर्दी झाली होती.