गंगापुर (छत्रपती संभाजीनगर): केंद्रातील भाजप सरकारला आगामी लोकसभा निवडणुकीत पराभव दिसत असल्याने देशातील विरोधी पक्षांना फोडण्याचे काम मोदी शहा करीत आहे कारण राज्याचे माजी मुख्यमंत्री काँग्रेस नेते अशोक चव्हाण यांनी आपल्या सदस्य पदाचा राजीनामा दिला आहे व ते भाजपच्या संपर्कात असल्याचे ऐकण्यात आले आहे त्यामुळे कधीकाळी काँग्रेसमुक्त भारताची घोषणा केलेला भाजप पक्ष आज काँग्रेसव्याप्त होत असल्याचा आरोप माजी मुख्यमंत्री उध्दव ठाकरे यांनी केला तसेच भविष्यात भाजपचा अध्यक्ष देखील काँग्रेसमधून आलेलाच असेल असे भाकीत केले
शिवसेना (उद्धव बाळासाहेब ठाकरे ) पक्षाच्या वतीने येथील पंचायत समिती मैदानावर सोमवारी(१२)रोजी आयोजित जनसंवाद मेळवा प्रसंगी ते बोलत होते;यावेळी खासदार संजय राऊत,विधान परिषदेचे विरोधी पक्षनेते अंबादास दानवे,माजी खासदार चंद्रकांत खैरे,आमदार उदयसिंग राजपूत,गंगापुर कारखान्याचे अध्यक्ष कृष्णा पाटील डोनगावकर,उपजिल्हा प्रमुख अविनाश पाटील,तालुकाप्रमुख दिनेश मुथा,माजी जि.प.अध्यक्षा देवयानी पाटील डोनगावकर आदी हजर होते.निवडणूक आयोगाने शिवसेना,राष्ट्रवादी पक्ष चोरांच्या हातात दिली आता अशोक चव्हाणांच्या निमित्ताने काँग्रेस पण देणार का ? असा जाहीर सवाल सभेतून उद्धव ठाकरे यांनी निवडणूक आयोगाला विचारला.
देशात सगळीकडे एकाधिकारशाही दिसून येत असून दहा वर्षात भाजपा सरकारने दिलेल्या एकाही आश्वासनांची पूर्ती केली नाही भाववाढ, महागाईने जनता त्रस्त आहेत मात्र केंद्रातले सरकार स्वार्थी वृत्तीने विरोधी पक्षांना फोडण्यात गुंग आहे भाजपाने मतांचा बाजार लावला असून विरोधी पक्षाच्या फोडाफोडीने स्व: पक्षातील निष्ठावंतावर अन्याय होत आहे हे देखील भाजप विसरत आहे तसेच या निर्दयी सरकारला देशातील शेतकरी व त्यांच्या आत्महत्यांकडे पहायला वेळ नाहीत,शेतीमालाचे भाव सातत्याने घसरत असून बळीराजा कर्जबाजारी होत आहेत मोदी सरकारमध्ये हिंमत असेल तर संपूर्ण देशात निवडणुकीपूर्वी कर्जमाफी करावी असे आव्हान ठाकरे यांनी केंद्रातील सरकारला केले.