शिक्षकांवर उपासमारीची वेळ

नांदेड: जिल्ह्यातील जवळपास ७५ कायम विनाअनुदानित उच्च-माध्यमिक शाळांतील शिक्षक-कर्मचाऱ्यांवर उपासमारीची वेळ आली

लोकमत न्यूज नेटवर्कनांदेड: जिल्ह्यातील जवळपास ७५ कायम विनाअनुदानित उच्च-माध्यमिक शाळांतील शिक्षक-कर्मचाऱ्यांवर उपासमारीची वेळ आली असून १९९७ पासून विनावेतन काम करणाऱ्या या कर्मचाऱ्यांच्यासंदर्भात शासनाने कोणताही निर्णय घेतला नाही़जिल्ह्यात जवळपास १९९७ पासून विनावेतन तत्त्वावर ७५ शाळा चालतात़ या शाळांमध्ये प्रत्येकी ५ ते ७ कर्मचारी कार्यरत आहेत़ या शाळांमधील शिक्षकांना वेतन मिळावे यासाठी पाठपुरावा सुरू आहे़ शासनस्तरावरही विविध अहवाल मागविण्याचेच काम मागील काळात झाले आहे़ सन २०१४ मध्ये शासनाने उच्च माध्यमिक शाळा कनिष्ठ महाविद्यालयाचे आॅनलाईन मूल्यांकन केले़ या बाबीसही ३ वर्षे पूर्ण झाले आहेत़ मात्र मूल्यांकनात पात्र ठरलेल्या शाळांची यादी शासनाने अद्यापही घोषित केली नाही़ अनेक शाळांचे मूल्यांकन प्रस्ताव शिक्षण उपसंचालक कार्यालय, शिक्षण संचालक कार्यालयातच धूळ खात आहेत़ नांदेडमधील ७५ शाळांमधील कर्मचाऱ्यांसह राज्यातील जवळपास २२ हजार शिक्षकांवर या निर्णयाअभावी उपासमारीची वेळ आली आहे़ कायम विनाअनुदानित शाळांमधील शिक्षक व कर्मचाऱ्यांच्या या प्रश्नांवर महाराष्ट्र राज्य कायम विनाअनुदानित उच्च-माध्यमिक शाळा कृती समितीच्या वतीने मागील १५ वर्षांपासून पाठपुरावा करण्यात येत आहे़ शिक्षकांच्या वेतन प्रश्नाकडे शासनाचे लक्ष वेधण्यासाठी १८ जुलै रोजी नांदेड-लातूर महामार्गावरील डॉ़ आंबेडकर चौकात रास्ता रोको करण्याचा इशारा संघटनेचे विभागीय उपाध्यक्ष प्रा़ डी़ आऱ नालंदे, प्रा. नागनाथ हिप्परगेकर, प्रा. एम़ ई़ सूर्यवंशी, प्रा़ बालाजी पावडे, प्रा़ डी़जी़ खरात, प्रा़ अंकुश राठोड, प्रा़ के़ डी़ खानसोळे आदींनी दिला आहे़