गायरान जमिनीसाठी तहसीलदारांना घेराव

परंडा : शासनाने तालुक्यातील सोनगिरी येथील गायरान जमीन कसण्यासाठी द्यावी, अशी मागणी करीत पारधी समाजातील महिला पुरुषांनी येथील प्रभारी तहसीलदार पाडळे यांना घेराव घातला.

परंडा : कुटूंबाचा उदरनिर्वाह भागविण्यासाठी शासनाने तालुक्यातील सोनगिरी येथील गायरान जमीन कसण्यासाठी द्यावी, अशी मागणी करीत पारधी समाजातील महिला पुरुषांनी येथील प्रभारी तहसीलदार एस. एस. पाडळे यांना शनिवारी घेराव घातला. तसेच २ जूनपर्यंत याबाबत निर्णय नाही झाल्यास तहसीलसमोर उपोषणाचा इशाराही यावेळी देण्यात आला. शनिवारी दुपारी दोनच्या सुमारास तहसील कार्यालयात पदवीधर निवडणुकीच्या अनुषंगाने छायाचित्रासह मतदार याद्यांच्या निरंतर मतदार नोदणीसबंधी बैठक सुरू होती. याचवेळी पारधी समाजातील चितरंग्या वांग्या पवार, राहूल चितरंग्या पवार, गणेश चितरंग्या पवार, मनिबाई चितरंग्या पवार, उषाबाई येवरड्या पवार, रुपाली राहुल पवार, गुड्डी गणेश पवार, चिवळाबाई तयाशा काळे, माधुरी काळे यांनी तहसीलदारांच्या दालनात प्रवेश केला. यावेळी त्यांनी ‘अम्हाला जगू द्या, अम्हाला जगण्याची संधी द्या,’ अशी घोषणाबाजी करीत सोनगिरी येथील गायरान जमीन कसण्यासाठी देण्याची मागणी केली. यावेळी पारधी समाजातील महिलांनी प्रभारी तहसीलदार एस. एस. पाडळे यांना घेराव घालून तब्बल अर्धा तास बैठकीचे कामकाज रोखून ठेवले. निवडणूक विभागाचे नायब तहसीलदार कुलकर्णी, समाजसेवक तु. दा. गंगावणे यांनी मध्यस्थी करुन आंदोलनकर्त्याना शांत केले. रितसर लेखी निवेदन द्या, यावर विचार केला जाईल. आपले म्हणणे शासनाकडे कळवू, असे अश्वासन प्रभारी तहसीलदार पाडळे यांनी दिल्यानंतर आंदोलनकर्ते शांत झाले. दरम्यान, प्रशासनाने २ जूनपर्यत जमीन न दिल्यास तहसीलसमोर मुला-बाळासह व जनावरांसह बेमुदत अमरण उमोषणास बसणार असल्याचे निवेदन आंदोलनकर्त्यांनी यावेळी दिले. यावर नऊ जणांच्या सह्या आहेत. (वार्ताहर) संसारोपयोगी वस्तू परत करण्याची मागणी २२ मे रोजी सोनगिरी येथील गायरान जमिनीमधील अतिक्रमण काढल्यानतंर प्रशासनाने संसारोपयोगी वस्तू ताब्यात घेतल्या आहेत. त्याही परत मिळाव्यात, अशी मागणी आंदोलनकर्त्यांनी यावेळी केली. यावर सदरील वस्तू सोनगिरी ग्रामपंचयातीच्या ताब्यात असून, त्या परत करण्याच्या सूचना ग्रामसेवकास दिल्या जातील, असे पाडळे यांनी सांगितले. जमिनीचा फेरफार ग्रामपंचायतीच्या नावे याबाबत बोलताना प्रभारी तहसीलदार एस. एस. पाडळे म्हणाले, सोनगिरी येथील गायरान जमीन ही ग्रामपंचयातीच्या मालकी हक्कास अनुसरुन आहे. या जमिनीचा फेरफार दस्त ग्रामपंचयातीच्या नावे आहे. यामुळे त्यावर अतिक्रमण करणे कायदेशीररित्या उचित नाही. निवेदनधारकांच्या मागण्या शासनास कळविण्यात येतील, असेही त्यांनी सांगितले.