इजिप्तच्या ‘कारीं’नी जिंकले मन!

औरंगाबाद : ऐतिहासिक जामा मशीद येथे आयोजित आंतरराष्टÑीय ‘कुराण किरअत’ कार्यक्रमाचा दुसरा दिवस इजिप्त येथील कारी बांधवांनी गाजवला. पहाटे ३ वाजेपर्यंत सुरू असलेल्या या धार्मिक कार्यक्रमात विदेशी स्पर्धकांनी औरंगाबादकरांची मने जिंकली. मागील काही वर्षांपासून शहरात ‘दारुल किअरत कलिमियाँ’ यांच्यातर्फे आंतरराष्टÑीय पातळीवर ‘कुराण किरअत’ कार्यक्रमाचे आयोजन करण्यात येत आहे. २३ आणि २४ मे रोजी या स्पर्धेचे आयोजन करण्यात आले होते. शुक्रवारी रात्री देशभरातील वेगवेगळ्या कारी बांधवांनी पवित्र धर्मग्रंथ ‘कुराण’चे पठण करून उपस्थित भाविकांची दाद मिळविली. शुक्रवारी रात्री २ वाजता कार्यक्रम समाप्त करण्यात आला होता. समारोपाच्या दिवशी म्हणजेच शनिवारी रात्री ९ वाजेपासून ऐतिहासिक जामा मशीदमध्ये भाविकांना पाय ठेवायलाही जागा उरली नव्हती. आंतरराष्टÑीय ख्यातीचे कारी कुराण पठण करणार असल्याचे सर्वांनाच माहीत होते. त्यामुळे भाविकांनी अलोट गर्दी केली होती. विदेशातील कारी बांधवांचा उत्साह वाढविण्यासाठी अधूनमधून भाविक घोषणाबाजी करीत होते. पहाटे ३ वाजता कारी मोहंमद रमजान अजाज यांच्या उपस्थितीत दुआ करण्यात आली. त्यानंतर कार्यक्रमाची सांगता झाली. ‘कुराण किरअत’ कार्यक्रमाच्या पहिल्या दिवशी मुफ्ती खलील उर रहेमान यांनी अध्यक्षपद भूषविले. दुसर्‍या दिवशी जामा मशीदचे प्रमुख मौलाना रियाज फारुकी यांनी अध्यक्षपद भूषविले. व्यासपीठावर मौलाना रशीद मदनी, खारी निसार अहेमद, मोहीब उल्लाह, मौलाना नसीम मुफ्ती, एम.एम. खान, शाहारेख नक्षबंदी, खाजा अमिनोद्दीन यांच्यासह अनेक मान्यवर आणि प्रतिष्ठित नागरिक उपस्थित होते. ‘कुराण किरअत’ कार्यक्रमाच्या दोन्ही दिवशी बुढीलेन व आसपासच्या तरुणांनी थंड पाणी, चहा, नाश्ता आदींची सोय केली होती. कार्यक्रमास आलेल्या भाविकांना कोणताही त्रास होणार नाही याची काळजी घेण्यात आली होती. हा कार्यक्रम आंतरराष्टÑीय पातळीवरील असल्याने ध्वनिव्यवस्था आणि प्रकाशयोजनाही अप्रतिम होती. कारी अब्दुल अल अली मिकरी, कारी मोहंमद रमजान अजाज, कारी आदिल अल्बाज तालीम, कारी मुतवल्ली, कारी मोहंमद अलपुरैदी, कारी सलमान तलामी, कारी इस्माईल इंजिनिअर, कारी याहिया इंजिनिअर यांनी ‘कुराण’चे काही अध्याय निवडून किरअतची पेशकश केली. १,४०० वर्षांपासून पवित्र धर्मग्रंथ जगभरात वाचला जातो. या धर्मग्रंथातील शब्दांचे उच्चारण, स्वरांची नजाकत काय असते हे इजिप्तच्या कारींनी दाखवून दिले. परमेश्वराने त्यांना स्वरांची एक वेगळीच देण दिल्याचे उपस्थित भाविकांनी नमूद केले.