संत एकनाथ महाराजांच्या पादुकांचे बसने पंढरपूरकडे प्रस्थान

पैठण : आषाढी वारीसाठी संत श्री एकनाथ महाराज यांच्या पादुका पालखीचे परिवहन महामंडळाच्या शिवशाही बसने सोमवारी नाथमंदिरातून मोजक्या वारकऱ्यांसह पंढरपूरकडे प्रस्थान झाले.

कोरोना सावटामुळे सलग दुसऱ्या वर्षी शासनाने पायीवारी रद्द केल्याने औपचारिक प्रस्थान झाल्यानंतर गेल्या १८ दिवसांपासून नाथांच्या पादुका गावातील नाथमंदिरात मुक्कामी होत्या. दरम्यान, विठ्ठल दर्शनाची आस असणाऱ्या वारकऱ्यांना यंदा विठुमाऊलीचे दर्शन घडणार नसल्याने पादुका प्रस्थानसमयी वारकऱ्यांत नाराजी असल्याचे दिसून आले. ४२३ वर्षांची पायीवारी प्रथा असलेल्या नाथांचा पायी पालखी सोहळा रद्द झाल्याने आषाढी एकादशीच्या दर्शनासाठी राज्य शासनाच्या निर्देशानुसार दोन शिवशाही बसने सोमवारी ४० मानकऱ्यांसह पादुका पालखीस नाथमंदिरातून वाजत गाजत ‘भानुदास एकनाथ’ अशा गजरात निरोप देण्यात आला.

रोहयो मंत्री संदिपान भुमरे, पालखी प्रमुख हभप रघुनाथ महाराज पालखीवाले यांच्या हस्ते नाथमंदिरात पादुकांची आरती करण्यात आली. याप्रसंगी भाविकांनी ‘भानुदास एकनाथ’ नामाचा गजर करून पालखी असलेल्या बसवर पुष्पवृष्टी केली. यावेळी संत एकनाथ महाराज मंडळाचे विश्वस्त दादा बारे, रेखा कुलकर्णी, अरुण काळे, खुशाल भवरे, श्रीकृष्ण कुलकर्णी, दूध संघाचे चेअरमन नंदलाल काळे, शहर प्रमुख तुषार पाटील, नगरसेवक भूषण कावसानकर, ईश्वर दगडे आदींची उपस्थिती होती.

नाथ महाराजांच्या पादुका असलेल्या शिवशाही बसला पारंपरिक पालखीप्रमाणे सजविण्यात आले होते. बस निघाल्यानंतर रस्त्याच्या दुतर्फा उभे राहून भाविक, वारकरी मनोभावे अंत:करणातून हात जोडून बसचे दर्शन घेताना दिसून आले. तालुक्याच्या सीमेवर मंत्री भुमरे व तहसीलदार शेळके यांनी बसला निरोप दिला. बससोबत उपजिल्हाधिकारी संदीप पाटील, नायब तहसीलदार संतोष अनर्थे, डॉ. सीमा साळवे व त्यांचे पथक पालखीसमवेत रवाना झाले. तसेच सुरक्षेच्या दृष्टीने पोलिसांची व्हॅन पालखीसोबत पैठण ते पंढरपूर व पंढरपूर ते पैठण अशी राहणार असल्याचे पोलीस निरीक्षक किशोर पवार यांनी सांगितले.

--

विठ्ठलाच्या दर्शनास भाविक मुकणार

‘आषाढी कार्तिकी, विसरू नका मज, सांगतसे गुज पांडुरंग।’ ‘विसरू नका मज’ असे पांडुरंगाचे म्हणणे आहे. दुसरीकडे शासनाने प्रतिबंध लादून पायी वारी बंद केली आहे. आता आम्ही पायी वारी कशी करायची, अशा उद्विग्न प्रतिक्रिया वारीस जाणाऱ्या वारकऱ्यांतून सोमवारी उमटल्या. यंदा सलग दुसऱ्या वर्षी कोरोनाच्या पार्श्वभूमीवर पायीवारी रद्द झाल्याने हजारो वारकरी विठ्ठलाच्या दर्शनास मुकणार असल्याने वारकरी अस्वस्थ झाले आहेत.

190721\img_20210719_161522.jpg

पैठण ते पंढरपूरकडे निघालेल्या संत एकनाथ हाराज यांच्या बसपालखीला निरोप देतान मान्यवर.