महाराजांवरील हल्याप्रकरणी ३० जणांविरुद्ध गुन्हा; परस्परविरुद्ध नोंदवल्या पोलिसांत तक्रारी
By लोकमत न्यूज नेटवर्क | Published: December 28, 2020 02:07 PM2020-12-28T14:07:21+5:302020-12-28T14:10:54+5:30
Crime against 30 persons in the case of attack on Maharaj : शुक्रवारी मोक्षदा एकादशीनिमित्त मेहरबान नाईक तांडा (ता. पैठण) भागातील श्रीराम टेकडीवर गणेश महाराज आणि निलजगाव येथील गावकऱ्यांत बाचाबाची झाली.
पैठण : तालुक्यातील गणेश महाराजांवर झालेल्या हल्ल्याप्रकरणी बिडकीन पोलिसांनी १४ जणांना अटक केली. यात महाराज आणि निलजगावातील गावकऱ्यांनी रविवारी बिडकीन पोलीस ठाण्यात परस्पर विरोधी तक्रारी दिल्या. यावरून निलजगावच्या अज्ञात २५ जणांसह गणेश महाराजांविरोधात बिडकीन पोलिसांनी गुन्हा दाखल केला. गणेश महाराजांवर औरंगाबादेत उपचार सुरू असून, त्यांची प्रकृती स्थिर आहे.
शुक्रवारी मोक्षदा एकादशीनिमित्त मेहरबान नाईक तांडा (ता. पैठण) भागातील श्रीराम टेकडीवर गणेश महाराज आणि निलजगाव येथील गावकऱ्यांत बाचाबाची झाली. यादरम्यान गणेश महाराज गावकऱ्यांवर तलवार घेऊन धावून आल्याने त्यांनी महाराजांवर तुफान दगडफेक करत त्यांना गंभीर जखमी केले होते. औरंगाबादच्या शासकीय रुग्णालयात उपचारादरम्यान पोलिसांनी गणेश महाराजांचा जबाब घेऊन निलजगावच्या अज्ञात ३० जणांविरोधात गुन्हा दाखल केला आहे, तर गणेश महाराजांनी वादा दरम्यान दोन्ही हातात तलवार घेऊन धमकावल्याप्रकरणी त्यांच्यावरसुद्धा गुन्हा दाखल करण्यात आल्याचे पोलीस उपनिरीक्षक राहुल पाटील यांनी सांगितले.
गावकरी आणि महाराजांच्या भक्तांकडून एकमेकांवर गंभीर आरोप.https://t.co/pbqay6s3r7
— Lokmat Aurangabad (@milokmatabd) December 26, 2020
रविवारी सायंकाळी निलजगाव येथील वारकरी भरत तात्याराव मोगल यांनी गणेश महाराजांविरोधात बिडकीन पोलीस ठाण्यात तक्रार दिली. गणेश महाराजांच्या फिर्यादीनुसार शुक्रवारी त्यांची गाय परिसरातील मका पिकात गेली असता मी गायीला मूर्ख, असे संबोधले; परंतु तेथे हजर असलेल्या वारकऱ्यांनी ते स्वतःवर घेत २५ ते ३० जणांनी मला मूर्ख कुणाला म्हणता, असे विचारत दगड, काठ्या व कुऱ्हाडीने जीवे मारण्याच्या उद्देशाने मारहाण केली. मला टेकडीवरून ढकलून दिल्याचे फिर्यादीत म्हटले आहे. दरम्यान, गणेश महाराजांची प्रकृती आता स्थिर असून, त्यांचे हातापाय फॅक्चर झाले आहेत. सध्या त्यांच्यावर औरंगाबादेत उपचार करण्यात येत असल्याचे पोलिसांनी सांगितले.