सावली : तालुका कला व क्रीडा महोत्सवाच्या वतीने येथील योगी बाबा नारायण धाम मठ परिसरात पार पडलेल्या पालकमंत्री चषक क्रीडा स्पर्धेत बल्लारपूर येथील न्यू टारगेट या संघाने इंद्रधनुष्य क्रिकेट संघाचा पराभव करुन पालकमंत्री चषक पटकावला.
सावली येथील युवकाने स्वत: तयार केलेल्या क्रीडांगणावर महिला व पुरुष कबड्डी व क्रिकेट स्पर्धेचे आयोजन करण्यात आले होते. २६ जानेवारी रोजी पालकमंत्री विजय वडेट्टीवार यांच्या हस्ते या कार्यक्रमाचे उद्घाटन करण्यात आले. या क्रीडा स्पर्धेत विदर्भातील अनेक संघ सहभागी झाले होते. क्रीडा स्पर्धेतील पालकमंत्री चषक न्यू टारगेट क्रिकेट क्लब बल्लारपूर, द्वितीय इंद्रधुनष्य क्रिकेट क्लब संघ, तृतीय पारितोषिक गुरुजी क्रिकेट क्लब संघ चकपिरंजी यांनी पटकावला. पुरुष कबड्डीमध्ये प्रथम पारितोषिक साईबाबा स्पोर्टिंग क्लब बल्लारपूर, द्वितीय इंद्रधनुष्य स्पोर्टिंग क्लब सावली, महिला कबड्डी स्पर्धेत प्रथम जय श्री राम महिला आखाडा, बल्लारपूर तर द्वितीय पारितोषिक पठाणपुरा व्यायामशाळा चंद्रपूर यांनी पटकावला. बक्षीस वितरण कार्यक्रमाच्या अध्यक्ष माजी नगराध्यक्ष रजनी भडके तर प्रमुख पाहुणे म्हणून माजी पंचायत समिती सभापती मोतीलाल दुधे, माजी गटनेता छत्रपती गेडाम, सामाजिक कार्यकर्ता प्रफुल्ल वाळके, सावली तालुका पत्रकार संघाचे अध्यक्ष सूरज बोम्मावार, अनुज मॅडावार आदी उपस्थित होते. प्रास्ताविक सामाजिक कार्यकर्ते चंद्रकांत गेडाम, संचालन व आभार परिमल डोहणे यांनी मानले. पंच म्हणून प्रा. विजय गायकवाड, प्रा. सुखारे, घनश्याम मेश्राम, रोशन बोरकर आदींनी भूमिका बजावली. यशस्वीतेसाठी अंतबोध बोरकर, प्रफुल्ल बोरकर, सचिन रायपुरे, भुवनेश्वर गणवीर, गुणवंत दुधे, प्रशांत नारनवरे, विक्रांत दुधे, अंकित भडके, रोहित बोरकर, बादल खोब्रागडे आदींनी प्रयत्न केले.