चंद्रपूर : शिक्षक हक्क अधिनियमांतर्गत पुढील सत्रामध्ये जिल्ह्यातील १४५ शाळांमधून १२३० विद्यार्थ्यांना प्रवेश मिळणार आहे. जिल्ह्यातील १४५ शाळांनी यासाठी शिक्षण विभागाकडे नोंदणी केली आहे. दरम्यान, विद्यार्थ्यांसाठी प्रवेश प्रक्रिया अद्यापतरी सुुरु झाली नसून ती कधी सुरु होणार याकडे पालकांचे लक्ष लागले आहे.
शिक्षण हक्क अधिनियमांतर्गत मागासवर्गीय, दिव्यांग्य व आर्थिकदृष्ट्या दुर्बल घटकातील विद्यार्थ्यांना इंग्रजी माध्यमाच्या खासगी शाळेत प्रवेश मिळावा यासाठी शाळेतील एकूण क्षमतेच्या २५ टक्के जागा राखीव ठेवण्यात येतात. पात्र विद्यार्थ्यांना २५ टक्के कोट्यातून दरवर्षी प्रवेश दिला जातो. यावर्षी शाळा प्रशासनाला २१ जानेपासून ३० जानेपर्यंत नोंदणी करायची होती. मात्र शाळांचा अल्प प्रतिसाद बघता संबंधित प्रशासनाने १० फेब्रुवारीपर्यंत मुदत वाढवून दिली आहे. जिल्ह्यात आजपर्यंत १४५ शाळांनी यासाठी नोंदणी केली असून १२३० विद्यार्थ्यांना या शाळांत प्रवेश दिला जाणार आहे.
दरवर्षी जानेवारी-फेब्रुवारी महिन्यामध्ये शाळांची नोंदणी, प्रवेश अर्ज प्रक्रिया आदी पार पाडली जाते. मात्र यावर्षी या प्रवेश प्रक्रियेला उशीर झाला आहे. त्यामुळे पालकांची चलबिचल सुरु झाली आहे.
--
प्रवेश प्रक्रिया अद्याप सुरु नाही
यावर्षी जिल्ह्यातील १४५ शाळांनी नोंदणी केली असून १२३० द्द्यार्थ्यांना प्रवेश दिला जाणार आहे. मात्र विद्यार्थ्यांसाठीची प्रवेश प्रक्रिया अद्याप सुरु झाली नसून ती लवकरच सुरु होतील, असा विश्वास शिक्षण विभागाला आहे. तर प्रक्रिया केव्हा सुरु होणार याकडे पालकांचे लक्ष लागले आहे. ग्रामीण शाळांच्या तुलनेमध्ये शहरी शाळांनी अधिक प्रमाणात नोंदणी केली आहे.