आंबेडकर वाचनालयाच्या बाजूलाच मोलमजुरी करून राहणारे विजय उत्तम गिर्हे यांच्या घराला रात्री नऊच्या सुमारास शॉर्टसर्किटमुळे आग लागली. मोठ्या प्रमाणावर धूर निघत असल्याने आजूबाजूच्या परिसरातील नागरिक जमा झाले होते. शेजारील एका घरातून हातपंपाद्वारे आग विझविण्याचा प्रयत्न केला गेला. मात्र आग आटोक्यात येत नसल्याने तत्काळ नगर परिषदेचा अग्निशमन दल पाचारण करून आग विझविण्यात आली.
विजय गिऱ्हे यांच्या मुलीचे दोन महिन्यांवर लग्न येऊन ठेपले होते व त्यासाठी खरेदी केलेले कपडे, भांडी घरातील टीव्ही, फ्रीज, कूलर, शिलाई मशीन, गहू आदींसह संसारोपयोगी साहित्य पूर्णपणे जळून खाक झाले. घरातील सर्व मंडळी कामानिमित्त बाहेरगावी गेले होते. फक्त घरात एकच महिला होती. बाजूलाच राहणाऱ्या पालावरील लोकांच्या झोपडीपर्यंत ही आग न पोहोचल्यामुळे मोठा अनर्थ टळला. शासनाने या कुटुंबास आर्थिक मदत द्यावी, अशी मागणी शेजारील मंडळींनी केली आहे.