चार लाख शेतकऱ्यांना मृदा आरोग्य पत्रिका

९३९ गावांचा सहभाग : तालुकास्तरावर वर्गवारीनुसार झाले वितरण

बुलडाणा: शेतकऱ्यांना आपल्या शेतजमिनीचे आरोग्य समजून त्याप्रमाणे पीक घेता यावे, यासाठी मृदा आरोग्य पत्रिका वितरण अभियान सुरू आहे. जिल्ह्यात २०१६-१७ मध्ये ६० हजार ८७५ मातीच्या नमुन्यांची तपासणी करण्यात आली असून, ४ लाख ४ हजार ९१२ आरोग्य पत्रिकांचे वितरण करण्यात आले आहे. रासायनिक खतासह अन्य बाबींच्या अतिवापरामुळे खालावलेल्या जमिनीचे आरोग्य सुधारण्यासाठी केंद्र शासन यंदापासून ‘मृदा आरोग्य पत्रिका" अभियान राबवत आहे. यातून प्रत्येक शेतकऱ्यांकडील शेतातील मातीचे परीक्षण करून त्याद्वारे जमीन आरोग्य पत्रिका तयार करण्याचे काम सुरू आहे. पहिल्या टप्प्यात २०१५-१६ मध्ये ३० हजार ८९४ मातीचे नमुने तपासण्यात आले. दुसऱ्या टप्प्यात २०१६-१७ मध्ये जिल्ह्यातील ९३९ गावांमध्ये ६२ हजार २१० माती नमुने तपासणीचे लक्ष्यांक ठेवण्यात आले होते. त्यापैकी ६० हजार ८७५ माती नमुना परीक्षण जिल्ह्यातील प्रयोगशाळेतून करण्यात आले. या अभियानात सहभागी ४ लाख ४ हजार ९१२ शेतकऱ्यांना तालुका स्तरावर आरोग्य पत्रिका वाटप करण्यात आले.अभियानात सहभागी शेतकऱ्यांचे एक हेक्टरपर्यंतचे सिमांतक शेतकरी, दोन हेक्टरपर्यंतचे लहान शेतकरी, पाच हेक्टरपर्यंतचे अर्धमध्यम शेतकरी, दहा हेक्टरपर्यंतचे मध्यम व दहा हेक्टरपेक्षा जास्ती क्षेत्र असलेले मोठे शेतकरी अशी वर्गवारी करण्यात आली. या वर्गवारीनुसार मृदा आरोग्य अभियानातून मृदा आरोग्य पत्रिकेचे वितरण करण्यात आले.९३९ गावांचा सहभागमृद आरोग्य पत्रिका वितरण अभियानात जिल्ह्यात २०१६-१७ मध्ये तेराही तालुक्यातील ९३९ गावांनी सहभाग घेतला. यात बुलडाणा तालुक्यातील ६६, चिखली १०७, मोताळा ८०, मलकापूर ४१, खामगाव १२२, शेगाव ४३, नांदुरा ६०, ज.जमोद ६८, संग्रामपूर ६६, मेहकर ११२, लोणार ६०, दे.राजा ४० आणि सिंदखेडराजा तालुक्यातील ७४ गाव अभियानात सहभागी झाले होते.