उपोषणाचा इशारा देताच ठिंबक संचासाठी लाभार्थींची निवड

भुमराळा येथील शेतकरी अजय देवानंद सानप व बिबी येथील शेतकरी सखाराम कुलकर्णी यांनी ठिबक व स्प्रिंकलरसाठी एका वर्षाआधी ऑनलाइन अर्ज केले होते. वर्ष उलटून गेले तरीही अनुदान मिळत नव्हते. त्यामुळे शेतकरी संतप्त झाले होते. हे अनुदान लकी ड्रॉ पद्धतीने होत असून, या लकी ड्रॉमध्ये मोठा भ्रष्टाचार होत असल्याचा आरोप या शेतकऱ्यांनी केला होता. शेतकऱ्यांनी एका वर्षाअगोदर अर्ज ऑनलाइन केले होते. त्यांचे अनुदान अजूनपर्यंत मिळाले नव्हते. काही शेतकऱ्यांनी पाच ते सहा महिन्यात अनुदान घेतले होते. त्यामुळे लकी ड्रॉ पद्धतीने होत असलेल्या ठिबक सिंचन व स्प्रिंकलर योजनेमध्ये घोळ सुरू असल्याची चर्चा लोणार तालुक्यात होत होती. एखाद्या शेतकऱ्याने ऑनलाइन अर्ज सादर केला असेल आणि लकी ड्रॉ पद्धतीने त्याचा नंबर जर दोन-तीन वर्षांनी येत असेल तर त्या योजनेचा काय फायदा असा थेट प्रश्न अजय सानप व सखाराम कुलकर्णी यांनी केला होता. वर्षाअगोदर ऑनलाइन केलेल्या शेतकऱ्यांना ठिबकचे अनुदान मिळत नाही आणि तीन चार महिन्यात ऑनलाइन केलेल्या शेतकऱ्यांना अनुदान मिळते कसे असा संतप्त सवालही या शेतकऱ्यांनी केला होता. अशा घोटाळेबाजी करणाऱ्या यंत्रणेवर कारवाई करावी व या शेतकऱ्यांचे रखडले अनुदान त्वरित द्यावे अन्यथा लोणार कृषी अधिकारी कार्यालयासमोर आमरण उपोषणास बसणार, असा थेट इशाराच या शेतकऱ्यांनी दिल्यामुळे ३ सप्टेंबर राेजी सर्वच लाभार्थींची निवड करण्यात आली आहे.