देऊळगाव राजा : राज्यभरात काेराेनाचे संक्रमण वाढल्याने राज्य शासनाने विविध उपाय याेजना सुरू केल्या आहेत. संचारबंदीसह जिल्हा सीमा बंद करण्यात आल्या आहेत. त्यामुळे इतर जिल्ह्यांना जाेडणाऱ्या सीमांवर पाेलीस बंदाेबस्त तैनात करण्यात आला आहे. तपासणीशिवाय वाहनांना जिल्ह्यात प्रवेश देण्यात येत नसल्याचे चित्र आहे. देऊळगाव राजा जवळ असलेल्या जालना सीमेवरही पाेलीस बंदाेबस्त तैनात करण्यात आला आहे.
राज्यात वाढता कोरोना प्रादुर्भाव राेखण्यासाठी राज्य शासनाने जिल्हा सीमा बंदीचे आदेश दिले. या धर्तीवर देऊळगाव राजा शहरापासून अवघ्या सहा किलोमीटर अंतरावर असलेल्या भिवगाव जवळ बुलडाणा आणि जिल्हा सरहद्द लागते. या सीमेवर पोलीस पथक तैनात करण्यात आले आहे. देऊळगाव राजा पोलीस स्टेशनचे पोलीस पथक आणि जालना ग्रामीण पोलिस स्टेशनचे पोलीस पथक यांच्यामार्फत संयुक्त कारवाई करीत आहे. बुलडाणा जिल्ह्यातून जालन्याकडे, तसेच जालन्याकडून देऊळगाव राजामार्गे जिल्ह्यात येणाऱ्या प्रत्येक वाहनांची तपासणी करण्यात येत आहे. यामध्ये वाहनातील प्रवाशांसह सह वाहकाचा कोरोना निगेटिव्ह रिपोर्ट, ई-पास आणि नवीन अध्यादेशानुसार, वाहनातील प्रवासी क्षमता तपासण्यात येत आहे. नियमांचे उल्लंघन झाल्यास दंडात्मक कारवाई करण्यात येत आहे. देऊळगाव राजा पोलीस स्टेशनचे पोहेकाँ प्रकाश धरमपल्ली, पोलीस कॉन्स्टेबल संतोष कासवे, जालना पोलीस स्टेशनचे पोलीस हेड कॉन्स्टेबल आर. के. भिसे, एस.एस. कांबळे आदी २३ एप्रिल राेजी तैनात हाेते.
चेक पाेस्टवर सुविधांचा अभाव
कडाक्याच्या उन्हात जालना व बुलडाणा जिल्ह्यांच्या सीमेवर चेक पाेस्ट उभारण्यात आली आहे. या चेक पाेस्टवर कुठल्याही सुविधा नसल्याचे चित्र आहे. तैनात असलेल्या पाेलिसांना पिण्याचे पाणीही उपलब्ध नाही, तसेच भाेजनाचीही व्यवस्था नाही. त्यामुळे दिवसभर कडाक्याच्या उन्हात दिवसभर जबाबदारी पार पाडणाऱ्या पाेलीस कर्मचाऱ्यांसाठी सुविधा उपलब्ध करून देण्याची गरज आहे.