कोरोना रुग्णांच्या उपचारासाठी महत्त्वपूर्ण असलेल्या हायड्रोकार्ब्ड, मिथील प्रेडनी सोलेन, लोमॉलीक्युलर वेट हेपॅरीनसह, फॅबीपिरॅवीर टॅब्लेट अन्य आवश्यक औषधी जिल्ह्यात उपलब्ध आहे. त्यामुळे फारसे चिंतेचे कारण नाही. कोरोनासंदर्भाने आवश्यक असलेल्या औषधीचे जिल्ह्यात घाऊक विक्रेते १४ आहेत तर किरकोळ विक्रेत्यांची संख्या ४५ आहे. या सर्व विक्रेत्यांकडे उपलब्ध असलेल्या औषधी साठ्याची दररोज माहिती घेण्यात येते. त्यामुळे गरजेनुरूप जिल्ह्यात आवश्यक औषधी उपलब्ध होत असल्याचे एका घाऊक औषधी विक्रेत्याने नाव न छापण्याच्या अटीवर ‘लोकमत’शी बोलताना माहिती दिली.
दुसरीकडे शासकीय रुग्णालयांमध्येही औषधींचा साठा भरपूर असल्याचेही जिल्हा सामान्य रुग्णालयातील सूत्रांनी स्पष्ट केले. कोरोनाबाधितांवरील उपचाराच्या दृष्टीने फॅबीपिरॅवीर टॅब्लेट, हायड्रोकार्ब्ड, मिथील प्रेडनी सोलेन, लोमॉलीक्युलर वेट हेपॅरीनसह अन्य औषधांचा साठा उपलब्ध आहे. परंतु हाफकिनकडून कोरोनासंदर्भाने औषधीसाठा तुलनेने कमी येत आहे. अन्य आजारांसंदर्भातील औषधीसाठाच अधिक येत असल्याचे जिल्हा सामान्य रुग्णालायतील सूत्रांनी नाव न छापण्याच्या अटीवर ही बाब स्पष्ट केली.
जिल्ह्याची रेमडेसिविर इंजेक्शनची दररोजची गरज खासगी आणि शासकीय रुग्णालय मिळून जवळपास एक हजार असल्याचे सांगण्यात येत आहे. त्या तुलनेत जिल्ह्याला दररोज २०० ते ३०० च्या आसपास रेमडेसिविर इंजेक्शन मिळत आहे. शासकीय रुग्णालयातील रुग्णांसाठी रेमडेसिविरची अडचण नसली तरी खासगी रुग्णालयात त्याची अडचण असून त्यासाठी रुग्णांची धावपळ होत आहे. त्यातच पहिला डोस हा दोन इंजेक्शनचा असल्याने त्याची जमवाजमव करताना रुग्णांच्या नातेवाइकांना मोठी कसरत करावी लागत असल्याचे चित्र आहे. प्रामुख्याने इंजेक्शनसाठीच रुग्णांच्या नातेवाइकांची घालमेल होत आहे.
--ऑक्सिजनवर असलेले रुग्ण--
जिल्ह्यात शनिवारी २५३ रुग्ण ऑक्सिजनवर असल्याची माहिती आहे. यामध्ये आयसीयूमध्ये ऑक्सिजनवर असलेले २०५, व्हेंटिलेटरवर ४८ रुग्ण असल्याची माहिती सूत्रांनी दिली.
--तपासणी किटचीही मुबलकता--
जिल्ह्यात कोरोनाच्या चाचणीसाठी वर्तमान स्थितीत रॅपिड टेस्टसाठी २० हजार किट, आरटीपीसीआरसाठीही ४० हजार किट उपलब्ध आहेत. आतापर्यंत जवळपास तीन लाखांपेक्षा अधिक किटचा संदिग्धांच्या तपासणीसाठी वापर झालेला असल्याचे सूत्रांनी सांगितले.
कोरोनाचे एकूण रुग्ण:- ५७,८१५
सध्या उपचार घेत असलेले:-७०४१