भीतीमुळे ग्रामस्थांनी दिला नाही खांदा : खुरपूरमध्ये आरोग्य पथक दाखल
लोणार : तालुक्यातील खुरपूर येथे स्वाइन फ्लूचा संशयित रुग्ण शिवाजी घुले यांचा ११ एप्रिल रोजी औरंगाबाद येथील शासकीय रुग्णालयात मृत्यू झाला. त्यांचा मृत्यू स्वाइन फ्लूमुळे झाल्याची वार्ता गावात पसरल्याने गावामध्ये भीतीचे वातावरण निर्माण झाले होते. यामुळे मृतक शिवाजी घुले यांना स्मशानभूमीमध्ये नेण्यासाठी कोणत्याही व्यक्तीने खांदा दिला नाही. अखेरीस बैलगाडीमध्ये मृतदेह ठेवून स्मशानभूमीमध्ये नेण्यात आला. शुक्रवारी खुरपूरमध्ये प्राथमिक आरोग्य केंद्राच्या पथकाने भेट देऊन स्वच्छता केली. तसेच सदर रुग्णाचा मृत्यू स्वाइन फ्लूने झाला काय, हे औरंबादवरून अहवाल आल्यावर स्पष्ट होणार आहे. खुरपूर गावातील शिवाजी विश्वनाथ घुले (वय ३९) यांना चार- पाच दिवसांपासून ताप आला असल्यामुळे उपचारासाठी लोणार येथे खासगी रुग्णालयात दाखल करण्यात आले. मात्र, ताप कमी होत नसल्याने त्यांना पुढील उपचारासाठी औरंगाबाद येथे शासकीय रुग्णालयात दाखल करण्यात आले. शासकीय रुग्णालयात उपचारादरम्यान त्यांचा ११ एप्रिल रोजी मृत्यू झाला. रुग्णाच्या नातेवाईकांनी प्राथमिक आरोग्य केंद्र रायगाव येथील वैद्यकीय अधिकारी डॉ.एन.डी. यमगीर यांना याबाबत माहिती दिल्यानंतर शुक्रवारी खुरपूर गावात आरोग्य पथक दाखल झाले. यावेळी गावात ज्या रुग्णांना ताप आहे, त्यांची तपासणी करण्यात आली. शिवाजी घुले यांना स्वाइन फ्लू असू शकतो, अशी शंका डॉ. एन. डी. यमगीर यांनी व्यक्त केली. याबाबत सविस्तर माहिती घेण्यासाठी औंरगाबाद येथील रुग्णालयाकडून कागदपत्रे मिळाल्यानंतर कळणार आहे. नागरिकांनी स्वच्छतेकडे लक्ष द्यावे, असे आवाहन डॉक्टरांनी केले आहे. यावेळी गावातील नागरिकांना तोंडावर बांधण्यासाठी मास्कचे वाटपही करण्यात आले. खुरपूर गावाला तहसीलदार सुरेश कव्हळे, नंदकिशोर मापारी, पंडित वाबळे व शिवसेना शहरप्रमुख पांडुरंग सरकटे यांनी भेट दिली. स्वाइन फ्लूचा रुग्ण ताप आल्यावर अन्न सेवन करीत नाही. शिवाजी घुले मात्र, रुग्णालयात जेवण करीत होते. तसेच स्वाइन फ्लू आधी गावात डुकरांना होतो, त्यानंतर माणसांना होतो. त्यामुळे शिवाजी घुले यांचा मृत्यू स्वाइन फ्लूने झाला असावा, याची शक्यता कमी आहे. अहवाल आल्यानंतर सर्व स्पष्ट होईल. - डॉ.एन.डी. यमगीर, वैद्यकीय अधिकारी, प्राथमिक आरोग्य केंद्र रायगाव.