बाजार समितीच्या सभापतीपदी टाले

खामगाव कृषी उत्पन्न बाजार समितीच्या उपसभापतीपदी दिपके.

खामगाव : येथील कृषी उत्पन्न बाजार समितीच्या सभापती, उपसभापतीपदाची आज निवड करण्यात आली असून, काँग्रेसच्या संतोष टाले यांची सभापतीपदी वर्णी लागली आहे. तर उपसभापतीपदी भारिपच्या नीलेश दिपके यांची निवड करण्यात आली आहे. जिल्हय़ातील सर्वात मोठी बाजार समिती म्हणून ओळख असलेल्या खामगाव कृउबासच्या निवडणुकीत अटीतटीच्या लढतीत काँग्रेस, भारिप व राकाँप्रणीत आघाडीने १८ पैकी १५ जागा जिंकत बहुमत प्राप्त केलेले आहे. यात काँग्रेसने ११ तर भारिपने ४ जागा जिंकलेल्या आहेत. यामुळे सभापतीपद हे काँग्रेसकडे गेले असून, उपसभापतीपद हे भारिपला मिळाले आहे. दरम्यान, आज स्थानिक कृउबास सभागृहात तहसीलदार आकाश लिगाडे व सचिव भिसे यांच्या उपस्थितीत सभापती व उपसभापतीपदाची निवडणूक पार पडली. यावेळी काँग्रेस व भारिप पदाधिकार्‍यांची उपस्थिती होती. यामध्ये जिल्हा काँग्रेस कमिटीचे अध्यक्ष विजय अंभोरे, जि.प. अध्यक्ष अलका खंडारे, माजी आ. दिलीपकुमार सानंदा, भारिप-बमसंचे नेते अशोक सोनोने, नगराध्यक्ष अशोक सानंदा, माजी जिल्हा काँग्रेस अध्यक्ष श्याम उमाळकर, पंजाबरावदादा देशमुख, न.प. उपाध्यक्ष वैभव डवरे, माजी जि.प. अध्यक्ष वर्षाताई वनारे, पं.स. सभापती कुसुमताई तायडे, अशोक मुळे, माजी नगराध्यक्ष सरस्वतीताई खासने आदींचा समावेश आहे.