पुढच्या वाहनाला धडकले, मागच्या कारने चिरडले रोजगारासाठी नागपूरकडे निघालेल्या दोन तरुणांचा जागीच मृत्यू

राष्ट्रीय महामार्गवरील उकारा फाट्यावर भीषण अपघात

भंडारा : राष्ट्रीय महामार्ग क्रमांक ५३ वर साकोलीजवळील ऊकारा फाट्याजवळ शनिवारी दुपारी ३:०५ वाजताच्या सुमारास एका विचित्र आणि दुर्दैवी अपघातात दोन युवकांचा जागीच मृत्यू झाला. त्यांची दुचाकी पुढील वाहनाला धडली. दुर्दैवाने मागून येणाऱ्या कारने या दोघांनाही चिरडले. मृतांमध्ये यादवराव गोपालराव वघारे (३६, आमगाव) आणि जितेंद्र रवींद्र उपराडे (२८, मोहनटोला, ता. आमगाव) यांचा समावेश आहे. ते दोघेही दुचाकीने रोजगारासाठी नागपूरकडे निघाले होते.

प्राप्त माहितीनुसार, वघारे आणि उपराडे हे मोटरसायकल क्रमांक एमएच ३५/एएम ०६७० ने नागपूरकडे जात होते. यावेळी ऊकारा फाट्याजवळ एमएच ३५/ के १५४३ क्रमांकाच्या टाटा मॅजिकच्या चालकाने प्रवाशांना उतरवून महामार्गावर अचानक वाहन वळविले. याच दरम्यान मागून येणाऱ्या दुचाकीची कारला जोरदार धडक बसली. धडकेमुळे दोन्ही युवक रस्त्यावर फेकले गेले. हा अपघात घडल्यावर वाहनासह चालक घटनास्थळावरून पळून गेला. त्याच वेळी मागून भरधाव आलेल्या डस्टर कारने (एमएच ०४/ जेजी ४३१८) या दोघांनाही चिरडले. यात यादवराव वघारे यांचा जागीच मृत्यू झाला, तर जितेंद्र उपराडे हा कारखाली अडकून काही अंतर फरफटत गेला. त्याला गंभीर अवस्थेत उपजिल्हा रुग्णालयात दाखल करण्यात आले, मात्र डॉक्टरांनी मृत घोषित केले. या डस्टर कारच्या चालकाचे नाव अशोक भैय्यालाल काळसर्पे (कवळी टोला, ता. गोरेगाव) असे आहे.

घटनास्थळी लगेचच पोलिस यंत्रणा दाखल झाली. उपविभागीय पोलिस अधिकारी मनोज सिडाम, वाहतूक शाखा निरीक्षक जितेंद्र बोरकर, आणि साकोली ठाण्याचे ठाणेदार महादेव आचरेकर यांनी घटनास्थळी पाहणी केली. या अपघातप्रकरणी फिर्यादी अशोक भैय्यालाल काळसर्पे यांच्या तक्रारीवरून टाटा मॅजिक वाहनाचा चालक अज्ञात असून, त्याच्याविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक प्रशांत वुडुले, संदीप भगत आणि महेश नेताम करीत आहेत.