'गुपिते तुझ्या पत्नीला सांगतो' अशी धमकी देत दोन मित्रांनीच उकळले ४ लाख रुपये

Bhandara : पवनीमध्ये दोन मित्रांनीच दगाबाजी करीत तिसऱ्या मित्राकडून ४ लाख २० हजार रुपयांची रक्कम उकळली.

लोकमत न्यूज नेटवर्क
भंडारा : पवनीमध्ये दोन मित्रांनीच दगाबाजी करीत तिसऱ्या मित्राकडून ४ लाख २० हजार रुपयांची रक्कम उकळली. विशेष म्हणजे, खासगी गुपिते तुझ्या पत्नीला सांगू आणि सोशल मीडियावर बदनामी करू, असे धमकावून हा प्रकार घडला. पोलिसांनी याप्रकरणी गुन्हा दाखल केला असून, दोघेही मित्र फरार आहेत.

ही घटना पवनी शहरात (जि. भंडारा) घडली. पतनी येथील ताडेश्वर वॉर्ड येथील रहिवासी असलेले तक्रारदार अंशुल गभणे (३९) तसेच धनंजय दुधपचारे (४२) आणि मीनल नन्हे दुधपचारे (३८, दोघेही लाखनी) हे घनिष्ट सबंध असलेले जीवलग मित्र होते. धनंजय आणि मीनल यांना अंशुलची जवळजवळ सर्वच खासगी माहिती आणि गुपिते माहिती होती. दरम्यान, धनंजय आणि मीनल यांनी अंशुल याला ब्लॅकमेल करण्याचा कट रचला. हे थांबवायचे असेल, तर रक्कम द्यावी लागेल, असे सांगून त्याच्याकडून ४ लाख २० हजार रुपये उकळले. तरीही, त्यांच्याकडून अतिरिक्त पैशांची मागणी सुरूच होती. अंशुलने त्यांना जास्त पैसे देण्यास नकार दिल्यावर, त्यांनी त्याची खासगी माहिती सोशल मीडियावर पोस्ट करून बदनामी करण्याची धमकी दिली.

मनाचा हिय्या करून नोंदविली तक्रार

एकीकडे बदनामीची भीती आणि दुसरीकडे मित्रांकडूनच होणारी फसवणूक या कात्रीत सापडलेला अंशुल बराच तणावात आला होता. अखेर त्याने मनाचा हिय्या करून पवनी पोलिसात दोन्ही आरोपींविरूद्ध तक्रार दाखल केली. या तक्रारीवरून पोलिसांनी भारतीय न्याय संहितेच्या कलम ३०८ (१), ३५१ आणि ३ (५) अंतर्गत गुन्हा दाखल केला. या प्रकरणाचा तपास उपनिरीक्षक प्रीतम येवले करीत आहेत.