सरपंच, उपसरपंचाने घेतली ५० हजारांची लाच

गावातील बीअरबार बंद करण्याकरिता ठराव न घेण्यासाठी ३ लक्ष रुपयांची मागणी केली.

परसोडी येथील घटना : नागपूर लाचलुचपत प्रतिबंधक विभागाची कारवाई, बीअरबारच्या एनओसीसाठी मागितले होते तीन लाख रुपये
भंडारा : गावातील बीअरबार बंद करण्याकरिता ठराव न घेण्यासाठी ३ लक्ष रुपयांची मागणी केली. यात ५० हजार रुपयांचा पहिला हप्ता स्वीकारताना सरपंचासह उपसरपंचाला रंगेहात पकडण्यात आले. ही कारवाई काल महाराष्ट्र दिनी भंडारा तालुक्यातील परसोडी येथे करण्यात आली. पंकज सिध्दार्थ सुखदेवे व दर्शन शंकर फंद अशी लाच स्विकारणाऱ्या अनुक्रमे सरपंच व उपसरपंचाचे नाव आहे.
ही कारवाई नागपूर लाचलुचपत प्रतिबंधक विभागाने केली. यासंदर्भात जवाहरनगर पोलीस ठाण्यात लाचलुचपत प्रतिबंधक कायदा व १९८८ अन्वये दोघांविरुध्द गुन्हे दाखल करण्यात आले आहे. माहितीनुसार, तक्रारदार हे गुरुनानक वॉर्ड भंडारा येथील रहिवासी आहेत. त्यांचे परसोडी येथे रेस्टारेंट व बार आहे. यासंदर्भात २३ नोव्हेंबर २०१६ रोजी सरपंच पंकज सुखदेवे व उपसरपंच दर्शन फंदे यांनी तक्रारदाराला म्हटले की, रेस्टारेंट व बार चालविण्याकरिता ग्रामपंचायत परसोडी येथील ना हरकत प्रमाणपत्र (एनओसी) घेतलेली नाही. गावातील लोकांचा ठराव घेवून सदर बार बंद न करण्याकरिता ३ लक्ष रुपयांची मागणी दोघांनी तक्रारकर्त्याकडे केली. सरपंच व उपसरपंचाला लाच देण्याची इच्छा नसल्याने तक्रारदात्याने याची तक्रार नागपूर लाचलुचपत प्रतिबंधक विभागाकडे केली. तक्रारीवरुन शहानिशा करण्यात आली. तसेच सापडा रचून महाराष्ट्रदिनी सरपंच सुखदेवे व उपसरपंच फंदे याला तीन लक्ष रुपयांपैकी ५० हजार रुपयांचा पहिला हप्ता स्विकारताना रंगेहात पकडले. या कारवाईने गावात एकच खळबड उडाली आहे. सदर कारवाई पोलीस अधीक्षक संजय दराडे यांच्या मार्गदर्शनात नागपूर एसीबीचे पोलीस निरीक्षक फाल्गुन घोडमारे, रविकांत डहाट, प्रविण पडोळे, उत्तमदास यांनी केली. (प्रतिनिधी)