आमदारांनी ठोकले जिल्हा पणन कार्यालयाला कुलूप

जिल्ह्यात ७३ आधारभूत खरेदी केंद्रावर धान खरेदी सुरू आहे. गोदामाच्या अभावाने खरेदी मंदावली आहे. परिणामी शेतकºयांना आपला धान उघड्यावरच ठेवावा लागत आहे. जिल्ह्यातील प्रत्येक आधारभूत केंद्रावर शेकडो क्विंटल धान उघड्यावर आहे. गत आठ दिवसांपासून अवकाळी पावसाचा कहर सुरू आहे. या पावसात खरेदी केंद्रावरील धान ओले होवून शेतकऱ्यांना फटका बसत आहे.

ठळक मुद्देखरेदी केंद्रावर अव्यवस्था : जबाबदार अधिकाऱ्यांना निलंबित करा

लोकमत न्यूज नेटवर्क
भंडारा : आधारभूत धान खरेदी केंद्रावरील अव्यवस्थेचा फटका शेतकऱ्यांना बसत असून अवकाळी पावसात शेकडो क्विंटल धान ओले झाले. यानंतरही प्रशासन गंभीरतेने घेण्यास तयार नाही. त्यामुळे संतप्त झालेल्या आमदार नरेंद्र भोंडेकर यांनी शुक्रवारी दुपारी येथील जिल्हा पणन अधिकारी कार्यालयाला चक्क कुलूप ठोकले. शेतकऱ्यांच्या दुरावस्थेला जबाबदार अधिकाऱ्यांना तात्काळ निलंबित करावे, अशी मागणी त्यांनी यावेळी केली.
जिल्ह्यात ७३ आधारभूत खरेदी केंद्रावर धान खरेदी सुरू आहे. गोदामाच्या अभावाने खरेदी मंदावली आहे. परिणामी शेतकºयांना आपला धान उघड्यावरच ठेवावा लागत आहे. जिल्ह्यातील प्रत्येक आधारभूत केंद्रावर शेकडो क्विंटल धान उघड्यावर आहे. गत आठ दिवसांपासून अवकाळी पावसाचा कहर सुरू आहे. या पावसात खरेदी केंद्रावरील धान ओले होवून शेतकऱ्यांना फटका बसत आहे. विशेष म्हणजे धान खरेदी केंद्र वाढवून शेतकऱ्यांना दिलासा देण्याचे निर्देश मुख्यमंत्री उद्धव ठाकरे यांनी दिले होते. त्यानंतरही अधिकाऱ्यांनी हे निर्देश गंभीरतेने घेतले नाही. जिल्हा मार्केटिंग अधिकारी व जिल्हा पुरवठा अधिकाऱ्यांच्या निष्क्रीयतेने शेतकऱ्यांना अवकाळी पावसाचा फटका बसून केंद्रावरील धान ओले झाले. शेतकऱ्यांनी आपली आपबीती आमदार नरेंद्र भोंडेकर यांना सांगितली.
शुक्रवारी दुपारी ३ वाजता अपक्ष आमदार नरेंद्र भोंडेकर आपल्या समर्थकांसह जिल्हा पणन अधिकारी कार्यालयात धडकले. तेथे उपस्थित अधिकाऱ्यांना जाब विचारला. परंतु कुणीही समाधानकारक उत्तर देवू शकले नाही. त्यामुळे संतप्त झालेल्या आमदार भोेंडेकर यांनी चक्क कार्यालयाला कुलूप ठोकले. यावेळी शिवसेनेचे पदाधिकारी अनिल गायधने, बाळू फुलबांधे, विजय काटेखाये, प्रकाश मेश्राम, मुकेश थोटे, राजू ब्राम्हणकर, नरेश बावनकर, नरेश उचिबगले, नामदेव सुरकर, राजेश सार्वे, यशवंत पंचबुद्धे, पुरूषोत्तम टेंभरे यांच्यासह शेकडो पदाधिकारी उपस्थित होते.

शेतकऱ्यांना लुटण्याचा गोरखधंदा
अधिकारी आणि व्यापारी मिळून शेतकऱ्यांना लुटण्याचा गोरधंदा करीत असल्याचा आरोप आमदार भोंडेकर यांनी घेतला आहे. सरकार शेतकरी हिताचे निर्णय घेत असताना अधिकाऱ्यांच्या धोरणामुळे शेतकऱ्यांची दुरावस्था होत आहे. शेतकऱ्यांच्या या दुरावस्थेला जबाबदार अधिकाऱ्यांना तात्काळ निलंबित करावे, अशी मागणी जिल्हाधिकाऱ्यांना दिलेल्या निवेदनातून केली आहे.