भुयार येथे पती-पत्नीवर क्रिकेट बॅटने हल्ला

मच्छिंद्र महादेव वंजारी (५५) आणि समता मच्छिंद्र वंजारी (४५) अशी जखमींची नावे आहेत. आपल्या स्टील भांडे विक्रीच्या दुकानात वंजारी दाम्पत्य बुधवारी सायंकाळी उपस्थित होते. त्यावेळी प्रज्वल सुधाकर अलोणे (१९) आणि अर्चना सुधाकर अलोणे (३९, रा. भुयार) तेथे आले. त्यांनी क्षुल्लक कारणावरून वंजारी यांच्यासोबत वाद घातला. शिवीगाळ करण्यात आली. यानंतर प्रज्वल आणि अर्चना आपल्या घरी गेले. परंतु काही वेळातच पुन्हा परत आले. त्यावेळी त्यांच्या हातात क्रिकेटची बॅट होती. या बॅटने प्रज्वलने मच्छिंद्र वंजारी यांच्या डोक्यावर हल्ला केला. पतीला मारहाण होत असल्याचे पाहून सोडविण्यासाठी गेलेल्या समताच्या डोक्यावरही बॅटने प्रहार केला. यात दोघेही गंभीर जखमी झाले. याप्रकरणी पवनी पोलीस ठाण्यात तक्रार देण्यात आली असून आरोपी प्रज्वल सुधाकर अलोने आणि त्याची आई अर्चना सुधाकर अलोने यांच्याविरुद्ध गुन्हा नोंदवून दोघांनाही अटक करण्यात आली आहे. अधिक तपास सहाय्यक पोलीस निरीक्षक बैसाणे करीत आहेत.